Ratu ah-I

Kum sawm vel a liam ta, Shillong khaw vawt vur mai hmun ah lehkhazir lai ania, chawlh laiin Aizawl ah ka awm lai ania. KTP,General-conference(inkhawmpui) nen a in nang ching hlauh mai a, tel tur in hming ka pe ve . Ratu khaw hming chu ka hre thin a, college kan kal lai a kan thiannu Lalteii te khua ani tih pawh ka hria. Mahse, ka la hmu ang tih erawh ngaihtuahna ka nei ngai lem lo. KTP inkhawmpui nghahna anih avangin Ratu khua lam pan in bus in kan han kal ta ani. Thalai awm khawm tih tak ah bus a tlan pah in an zai ho thap thap mai a, an hla sak ho chu hla lar thar ani chek ani ang chu, sak thiam ka nei ve mang hauh lo mai a!

Tichuan kan tlan zel a, Ratu thlen hma in khaw tam tak ah kawng kham zawng in hrui an lo thlung a, theitui an lo zuar a, kan han in sak tak lawp lawp a. Ratu khua chu tlai lam ah kan thleng a, thlen in tur an han sem dan dan a,kan thlen in ah mikhual ho kan han awm kim chiah chu, in pakhat ah mikhual thleng kan tam hle mai.Kan thlen in ah chuan mi 30 vel kan thleng ta in ka hria. In dang a mikhual thenkhat te phei chu an thlen in ah mutna an leng lova, UPC biakin ah zan a riak te pawh an awm a; hemi inkhawmpui an han thlen meuh chuan an khua an tanrual zia a ti lang ve viau in a hriat. Chhungkaw thenkhat lah in an in a riahna leng lo an mikhual ho riahna tur in an in bul ah di in te an lo sa thar ve bawk.

KTP inkhawmpui ah ka vawi khat tel na ani bawk a, zan khatna inkhawm tur a pandal a thutna han zawn chu a khawr theih hle mai. Chutah kan han zai tan a, a “bass” sak dan tur te, hla bu a solfa en dan tur te,“doh-hniam…doh-sang…etc” ka kalpui pa in min han zirtir chawp tak lawp lawp a. Biakin a inkhawm a hla sak thum ve satliah ringawt ang alo ni hauh lo mai !!Mahse han zai hnem chuan kan lo hre ve ta tial tial a. Thalai rual a hu hova han zai thup thup mai kha chu a va han nuam tak em!!

In khat ah mikhual thleng kan thahnem bawk a, chawbel leh chawhmeh bel a lian tawk bawk aniang, chaw leh chawhmeh a hang thei khawp mai. Dailuah hang tak mai leh thlenin te kawmthlang ami zawngtah bal(lawh) thar ngei mai leh hmarchate rawt han ei meuh zawng, chaw eikham chuan kan rih belh lawih hian a hriat thin!!

Chaw ei sawi tak ah chuan mikhual nei ngah lehzual an VCP te mawlh kha aw!!! an in pekna a fakawm thlawt ani.Mikhual 100 aia tam an thleng a, chaw ei hun te khan in koh khawm a buaithlak deuh ngei in a rinawm a, an in kawt ah dar an vaw ri tawp zel !!!

Kan thlenna in chu a chung rangva, a bang dap leh a chhuat thingphel ani a. A kawngkhar ah mizopa kawngkhar, mau hmang a siam(tah) ang hi an hmang a. Hawn dawn chuan a sir zawng a nawr tawlh mai tur kha, thlenpui thenkhat hawng thiam lo an awm tlat mai. Tlai khat chu chaw ei hun nghak a kan zai thap thap laiin kan thlenpui nu pakhat hian kawngkhar chu a rawn keu a, a hmai a rawn lang zawk a, a khar leh thin a, a tih nawn fe hnu ah a tawp ah kawngkhar chu hnuai lam atanga hlim chho in a rawn kun lut a , “enga tinge?” ti a kan han zawh chuan , a hawng thiamlo hi alo ni a. Mizopa kawngkhar ang hi alo la hmu ngai lo hi alo ni a!! MA zir zo tawh pawh ,khawpui a piang a sei lian tan chuan hmuh ngai miau loh chuan hriat ngaihna awm lo ni awm tak ani. Kan nuihpui nasa khawp mai.

Thil te te!!

Hetiang ang hmun ruahtui tlak tlem na hmun ah leh nghal, hetiang ang thingkung lian a han awm hi chu khaw hawi a ti hahdam bik ngawt mai. Ni sat vawl vawl ni pawh hian a daihlim hnuai a han kal chuan a khaw lum te pawh ati nep deuh sawt in a hriat.



Heng a kawt zawl a thingkung lian awm khup mai te hi,hmawlh khawh bur vu mai emaw, thil zum a lo ker ta emaw hmuh tur a awm lo reng reng!! A daihlim hnuai a hmun awl remchang ah hian thalai ho in inrinni leh chawlhni a piang in cricket khelh nan an hmang ziah tih te rilru a ngaihtuah phei chuan an kut a hlei lo ve hrim hrim nge maw ni dawn ni?



Inchung a han lawn a han thlir phei chuan in thinghnah hring phei dup ni mai hian a lang a, a thingzar ah te chuan thehlei leh sava thenkhat te ,vaki thleng in tlai lam ah phei chuan hmuh tur an awm thin!! Naupan lai a zuangtui leh mutthi ram inkar saisih hmun a vaki rual an thlawk lai kan hmuh te, vahlah an hram chiah chiah kan han hriat thin te pawh rilru ah a lang !! Tunah lah chuan saisih ram vel ah chuan In a ding fur tawh mai bak ah a thing lian awm chhun kan hmuh ve phak ho te pawh an kit zo deuh vek tawh...a thing tam zawk kha chu a ram nei tu ni lo in midang in a ruk a an kih an la ti zui!!



Ei rawngbawlna atana thing kan hman tih tlem nan hian nizung chakna hman uar tum ta ila kan ti thei angem?. A hranpa hlak in tuiherhhawna a awmna apiang ah tuilum herhhawna tur hi an dah a. Inbual nan te leh eitur han siam nan te tuilum a awm nghal reng a, Gas hman ati tlem sawt a, electric hmang a tuilum a ngaih loh phah bawk nen!!Mizoram lam ah te a tih chi ve angem aw??nge kan hmang tan tawh zawk?


Hei a meter a lan dan chuan tanky atanga a tui lut lum zawng chu 43 degree C vel anih hmel a!!



A lo chhuak leh lam tui lum zawng chu 90 degree C vel ani ta daih mai.

Enge hna lam ah kan tawn te !

Rural development a thawh a , Tamil Nadu state ah pawh district chang kang lo ber zing a mi 'semi-desert' ang tluk deuh thaw a khaw ro, hmun then khat te phei chu a thing awm chhun te pawh 'kalahari desert' a awm thin nen ava in ang tak em tih vawng vawng tur chi, a khaw thenkhat chu an local zu 'arrak' an tih mai siamna hmun pui, zu avanga mipa puitling zawng zawng deuh thaw in police case an awrh chu sawi loh, zu avanga chhungkhat pa a boral tawh avanga hmeithai tam em em na, atanga chennai khawpui a han insawn luh chu boruak hap a inthlak nasa hle mai.Mahse, a changkang lo viau e ti lo chuan damchhung a ka hriat ngai loh tur a ka rin hriat ka neih phah a, panchayat a hmeichhia president awm hi an pasal te an inrawlh vak loh chuan khaw chhung ah nghawng a neih dan te pawh ngaihnawm tak ani!! District changkang lo ber pawl e ti lo chuan TSC(total sanitation campaign) lam ah chuan hmeichhe panchayat president ho thawh rim na zar ah award chu kan hmu hnem fu lawi bawk si!!

Chutah chennai lam ah public service commission ah min sawn.VAO (village administrative officer) hna lak in min lo hmuak , sawrkar in kum 5 chhung hnathar lak a khap bur hnu ah post ruak awm ho hnawhkhah leh vek a tum lai vel alo ni bawk. VAO hnaruak 2500 awm ah dil tu nuaih ruk sing kua teh meuh kan han nei teh reng a! mahni tan hna thar ni bawk nen, tun hma deuh in hmun then khat ah 'hall' pawn atang in aurinna(micro-phone) hmang in a chhan na an chhiar chhuak tih te alo awm bawk nen, lu a hai viau chang atam hle mai!! Mahse , hmun pakhat ah zurui chung a exam ziah tum an lo dang a, tih bak chu buaina em em awm lo in kan ti thei ta hram.
Han ti hram teh ang,chhiar tu ten an chhiar chak zawng an tar lang chak ani chek anga, hmun dang a buaina awm lova thil a kal zia tarlang lo in,'media' lam chuan hmun pakhat a rui chung a exam ziah tum hi an tarlang vek zawk nia maw le!!TV thleng in!!

Thawnthubu chhiar

TV en tur mai kha la tam hek lo le, sikul chawlh lai chuan chaw ei kham ah AIR chanchinthar dar 6:30 a ngaihthlak zawh chuan u te ho thawnthu chhiar ngaihthlak leh an ti ti ngaihthlak kha tih tur awm chu ani deuh mai thin a. Zan mut naah 'Lallianvunga vanglai' mu chung a an chhiar rik ngaihthlak vang vang chuan in a tuk zing thawh hlim ah pawh hian rilru ah ala cham zui vang vang zel mai ani.

Chutah middle school te kan han rap ve tan a, ngaihnawm tur khawp in kan han chhiar thiam ve ta..kan han thu bial laih a ,pakhat in 'wayne cole' thawnthu an chhiar ri a, a hnu ah thil lei a chhuah pah te hian kawng ah kan han sawi zui laih laih thin lai vel te kha aw!! CIA leh KGB tih vel chu rilru in a hre bel hlarh hlarh khawp mai..a thawnthu kha a tak anih leh nih loh ah erawh inhnialna a tawp hlei thei mang lo thin zawng chu ani.Mi hrang hrang ta kan hawh kual hnu chuan 'wayne cole' bu chhuak ho chu kan chhiar zo thei ta hram.

Naupang sunday sikul chawhnu inkhawm ah hian thawnthu sawina ni a awm thin a. Ben hur, qou vadis,cotacomb martar te, etc vel te ngaihnawm ti em em in kan ngaithla thin. Inkhawm kaikim lawmman la pawh kan tha hnem viau thin reng ani. A hnu ah ka chhiar ve leh vek a , a ngaihnawm ka tih ngai reng tho in ngaihnawm ka ti.

Chutah tlem in kan han upa leh deuh a, 'cowboy thawnthu' ah kan han kai a.Pakhat in a chhiar rik ai chuan in mahni a chhiar mai khan ka a kham lo kan ti ta deuh zawk nge ni, thian inkawm e ti lo chuan thutthleng sei ah a hrang a mu in 'sudden' thawnthu kha nileng thak thak a chhiar chang te pawh kan nei. Hnatlan nikhua te pawh hian rual u zawk te nen 'sudden an Hell city" a beih dan te, Dusty Fog nge phawi rang ang Sudden-a tih vel te chil per sawr sawr khawp a sawi ho te pawh kha nuam ve deuh ani. Kan thianpa pakhat phei chuan in a zing thawh hlim te hian a kut hian pistol hi a phawi chhin a phawi chhin thin ani awm e!! A phawi ran leh ran loh zawhna chang ka lo hre lo kha chu ka ui leh hnuhnawh, tunah han zawt dawn ila min chhang tha duh in ka ring tawh si lo!!

College kan han rap chho a, thawnthubu chhiar a khat tawlh tawlh.Mahse, vawi khat chhungte in ah khawhar kan han riahpui ve a. An veng ah chuan 'chess' an lo uar fu mai a.A sawn dan thiam ve tawk tawk chauh tan chuan han tuipui ve a har fu mai, vawi 5 vel kan sawn hman chauh tih tur ang ah hian min dang hlum zel mai a, ti chuan thawnthu bu chhiar lam ah ka tuan ta zawk a, khawhar in bul a man chawi a hawh theihna library a an thawnthu bu neih ho chu ka chhiar hnem viau hman ta in ka hria, 'veronica' atanga M&B thleng in *hihi* Carole Mortimer tih te pawh hre bel hman fu mai!!

Ka nu SMS

SMS chu kum lam a la naupang lam deuh tan chuan a tih dan thiam zung zung a awl anga, thiam a awl mai bak ah hman na tur leh mi dang man tlawm zawk a biak zung zung nan a awlsam a, khaw lian zawk a cheng leh kum lam a naupang deuh te tan chuan SMS thawn dan thiam lo nih chu thil ni awm ang lo hu a ngaihdan te pawh a awm mai thei.Mahse, ka nu kum 60 chuang tawh in a tu leh fate chanchin hriatna tur a SMS thawn dan a han zir zet chu aw....

Mizoram lam ah Samsung hand-set hmang in a thiante leh ka u te ho in a thawn dan an zirtir thiam tawh. SMS kan inthawn ve thin; ka thiante ho bul ah ka nu in SMS min thawn tih kan sawi zet chu , mak ti in engtin nge a thiam theih? min ti sup sup mai nia!! Hetiang a nun dan pangai anga awm ve anga kan ngaih hi ka nu te ang kum rualpui tan chuan India ram a hnam dang zing ah pawh an lo thiam chak vak bik lo ani mai thei ani.Hetiang lam ah hian hmasawnna chak zia leh dang lam chak zia hi aw!

Chutah ka nu , ka bul a awm tur in a rawn kal. Samsung chu a har em mai Nokia hi hman a awl sam zawk ang tiin, Nokia hman kan han tum tlang!! A awlsam zawk anga ka hriat kha ani tan chuan alo ni ngawt lo....a thiante leh a thawhpui thin ten Samsung hman dan tur an zirtir ang khan Nokia hman dan tur a hriat thiam zawng tur in ka zirtir ve thiam lo ani teh chek ang chu, kar khat teh meuh mai Nokia hand-set hmang a SMS thawn dan ah kan buai anih chu maw le...phone hmang in Samsung hman dan zirtirtu te pawh kan rawn ngun na rawh e. A tawp ah chuan thiam tum ta ngang chu a thiam ta nge nge!!

Mi dang SMS ang lo tak mai in ,ka nu SMS ah chuan a sawi duh a rawn sawi nghal tawp ngai lova, a SMS tan tir ah hian min koh dan a min rawn ko in "aven..........." ti hian a bul a rawn tan ziah anih chu!! SMS thawn thiam tur a a beih na te, min ngaihtuah vang ani tih te ka ngaihtuah hian , ka nu SMS hi chu ka chhiar nawn ka chhiar nawn zel mai!!

Autorickshaw driver nen thukam hnih khat.

Kan tlai lam tih tur te kan tih zawh chuan, in a han haw mai nan chuan ala hma deuh avang in 'city centre' lam ah kan han kual a.A roof-top restaurant ah chuan zanriah ei nghal mai ila, ti a kan rel zui tak avang leh, a tlai deuh hlek dawn avang in driver in nghah tir chuan zan a haw tlai lutuk dawn a hriat avang in,driver haw tir mai ila, autorickshaw in kan haw mai anga chuan a khat reng reng alawm tiin kan rel ta a. zanriah ei zawh in autorickshaw chu kan han chuang ve ta ngei mai a,tamil tawng thiam ang ang in kan be ve nawk nawk a, he hun rei lo te chhung a thukam hnih khat a kan inbiakna chu...

"Beach road lam ah kal ila sea-breeze a awm tawh anga a nuam zawk ang a"

"tun a kan tlan mek na hi one-way ani a, u-turn awm na thlen chuan mount-road a hla tawh lova , mount road lam ah kal ila kan thleng hma zawk ang"

"OK. chuan autorickshaw hi nangma ta ani em?"

"Ni lo, man chawi (rent) in ka hawh ani a, nikhat ah a neitu hnen ah Rs 150/- hawh man ka pe a, petrol leh a repair man zawng zawng ka tum nghal vek bawk a"

"chutiang ai te chuan second-hand tal te pawh lei la ani mai alawm"

"A repair a ngai zing a, repair na senso a sang hma lutuk a , a hlawk lo zawk alawm"

"Petrol man paih vek tawh hnu in nikhat ah engzah vel te nge ila hlep theih a tlangpui in?"

"Rs 400/- a hniam ber ah pawh ani a, mahse repair man senso hi nitin a chhut theih loh a chuvang in hlep chu chhungkaw chawm nan chuan a sang lutuk chu ani lo"

"Khawi khua a piang a seilian nge i nih?"

"chennai"

"Kum engzah nge i nih?fate i nei em?"

"kum 35 ka nia, fa pathum ka nei a sikul ah an zirlai an ni mek"

"english i thiam em?

"thiam lo"

"telugu emaw hindi emaw tal i thiam em?"

"thiam lo tamil chiah ka thiam,ka fate chuan english an thiam"(nui var var chung in a sawi a)

"chuti chennai a piang a seilian ni bawk si sikul pawh i kal na nge?"

"aw kal lo, ka naupan tet laiin ka pa in min thih san a, ka nu inhlawhfakna ringawt chuan chhungkua ei kan hmu bawk si lova, chuvangin naupan tet atang in sikul kal lova hna ka thawh angai alawm"

"sikul a thlawn vek zirlaibu leh uniform te thleng pawh a a thlawn vek sawrkar sikul te pawh a awm hi , chung te pawh chu i ngaihtuah ngai lo em ni?"

"kan naupan laiin kan veng ah chutiang sikul a la awm ngai hlei nem"

"I pa eng hnathawk nge?"

"cycle-rickshaw khalh a ei zawng thin ani"

"chennai ah cycle-rickshaw kal theihna chu veng pawn lam ah chauh ani sia ,khawi ah nge cycle-rickshaw chu a khalh thin a?"

"an hunlai te chuan cycle-rickshaw kal phal na deuh vek alawm"

"tunah chennai ah khawi veng ah nge in khawsak?"

"Adyar ah"

"Nangmahni in em ni?"

"Ni lo"

"Inluah man engzah nge thla khat ah in pek?"

"In zim te mai ania Rs 1000/- inluah man ah kan pe thin"

Hetia a sawi zawh rual vel hian traffic a jam deuh avang in bul a mi autorickshaw driver chu a han au nghal a, 'Ritchie street' awm na a han zawt a, a chhan chu Ritchie street hma bul a sub-way ah kan chhuk dawn ti a kan hrilh avang in ani chuan alo la hre chiang lo ni tur ani..a hnung a ben keuh pah in..

"Ritchie street awm na chu ka hre ve tho a lawm maw le, ka sawi na ah kal zel la kan thleng ani mai "

"aw le aw le " (rawn nuih let var var pah in)

Chuan Ritchie street kan thleng ta a, a chuan man te kan in pek fel hnu chuan , sub-way lam ah chuan step ah ka chhuk thla ta zel a, ka kal liam dawn hnaih tawh chuan ka han hawi let a, autorickshaw driver chuan min lo la thlir vang vang mai tih ka va hmu thei a!!

Ka han ngaihtuah a, ani tan chuan khawvel alo pian chhuahna chhungkua avang pawh ani mahna, a pian rual chiah a piang ve mi awm thei zawk te fanu/fapa chuan , he khawvel intlansiakna ah hian thui tak an tlan san nghal ngawt mai ni te hian ka hria a!! cycle-rickshaw khalhtu in autorickshaw khalhtu a hring a, hma sawn na rahbi chu an lawn zawt zawt lem lo a ang khawp mai. India ram in zalenna a hmuh atanga chhiar pawh a kum 60 liam tawh hnu pawh hian, zalenna tak tak han chen ve tur chuan an sum neih in ala pha ngang lo ni te hian ka hre thul!!!

Vawi khat Ramnad a ka awm laiin , trawley nawr tu pakhat hian ka closet siam tir hi quarter ah a rawn dah a. Trawley chu ama ta anih leh nih loh ka zawt a, ani pawh chuan man chawi (rent) a a hawh anih thu min hrilh a. Engvang in nge hetiang man chawi a hawh ang chi hian an tih tlat mai aw?? tih rilru ah a awm vang vang mai nia. Thla hmasa lawk in sawrkar in 'scheme' pakhat a siam a, autorickshaw driver ho in an duh chuan soft-loan an tih ang chi, a pung tlem te chauh nei leh , thlatin a rulh ngai tlem te ani a, mahse loan la duh an hmu mang hauh lo nia!! Anmahni hnam zing a caste-system avang hian caste sang zawk ten an lak an phal lo nge ni anga?an eizawn na lam a thil ti thei zawk ten , an dinna tur stand leh anmahni dawr tu tur te awm theihna lai an 'control' tlat anga, chuvang in loan la in mahni in lo nei ve ta pawh nise la , an hlawk phah dawn chuang lo em ni ang aw, tih te ngaihtuahna min neih tir a. Mahse, chung thleng thleng in zawt tur in hun a tlem bak ah, hmelhriat loh hnen ah chuan a sawi ngawt duh in a rinawm bawk si loh!!

A hun lai chuan...

Rotlingpa mi ropui nen chuan kum hnih chhung teh meuh bak ah, kan inhriat hnu chuan Mizoram a ka awm ve tawh chuan hun kan hmang dun hnem a, lo in ngam ta viau pawh ni ila a awm ve viau tawh.

Mahse, a chung a picture a mi nen khi chuan rei kan awm dun lo.Mussoorie a foundation-course training laiin thla thum vel kan awm dun a.Mahse, mak ve deuh mai chu a hnu kum sarih aia rei tawh ah pawh hian, kan in be reng lem lo na in, kan la in ngam dun in kan titi duh zawng ala in ang bawrh bawrh hle mai.Tennis khelh ve kan tum sa sawi..serve dik a har ang reng fu..a dik palh hlauh tum in kan la let thei mang lo, leh lam in an lak let dik in kan la let thiam vak lo ve ve tih erawh sawi lo mai ila..alo zak palh ange!! Mahse ,table-tennis ah chuan kan inhneh tawk ang reng khawp mai. Tlem a han tan loh deuh in ka kang ang reng a, han tan deuh in a kang ve leh dawrh mai si a....tan thiam erawh a har ang reng fu.

Tuktin zing dar 6 hma deuh in ,cook in door-bell a rawn hmet ri a, dar 6 ah chuan playing ground ah PT tur a intlar hman zat zat angai. Tlai lam cultural programme zawh hnu a, dinner ei zawh leh hnu a, a tuk class na a 'discussion' leh tur 'reading material' chhiar a ,internet khawih leh chuan zan dar 12 hma a mut a har khawp mai. Zing dar 6 la rik hma minute 10 vel pawh hi mut nan a thlak hlelhawm tawh thin. Hetiang ang anih avang hian kawng khar pawn a thingpui dah tir a, door-bell an hmeh palh tak hlauh pawh a ri ring lo tur a bubble-gum thial hnu 'bell' a bel tur tih ngaihtuahna min kawh hmuh tu te alo ni bawk nen...!!

Pa fiamthu duh tak, engtin pawh in han in kap kual ila, nui huah huah thei zel anih teh lul nen, zirtirtu te kha chuan han tih vak ngaihna pawh an hre bik lo ani ta deuh ber in ka hria. 'Management class' a 'law' lam an chhiar a, 'Law' class a 'management reading material' an chhiar luih ngat thin pawh khan , ani hi zawng ...an ti ani ange an hau ngai tlat lo!!


A bula ding Robert-a te tak kha aw...mi dang dai ava ni tak em!! manipur lam chhuak ni in fiamthu duh ve tak leh tawng duh ve tak mai hi ania..kan awm ho chhung khan mi dang zawng aiin a lar mai awm e , tih theih tur ani. Mi 400 vel zing ah khan Robert-a hre lo kha chu, an mahni lam zawk ah dik lohna an nei emaw ni zawk le tih theih tur ani. Hepa mak leh zual na chu , tunah Rome ah awm in hman deuh khan min rawn phone a, a driver in puih a ngai a lo pui ta che in office kawt ah a ding tawh a, tiin a rawn sawi a.A driver a rawn pen lut chiah mai chu ka phu zawk mai nia...Rome khawpui, lar leh khawpui chanchin ngah ah pawh tamilian tho driver ah lo hmang a maw le...!!

Robert-a chu brahmin nen room khat ah awm mahse la, bawngsa pickle ei chung in computer a khawih miah miah mai a, a roommate khan computer a hman ve dawn chuan a key-board kha a hru fai mai ani!! Engmah a sawi sel ngai lo, pa rilru tluang tak leh zau tak ani tih a hriat vang emaw ni teh reng dawn ni...!

Vawi khat chu, Robert-a bawk hian manipur lam rawtuai thur (mirungba an ti emaw ni) hi a dawng a. A room ah vawksa nen kan han chhum chiah mai chu, a rim alo na deuh emaw ni sawi sel tu an tam rem rem khawp mai. A hnu ah chuan kan ti ngai ta lo. Jacket fual deuh hi ka ha a kan siam lai chuan, ka jacket ah thleng khan a rim a nam vang vang thei mai nia maw le. A puar erawh kan puar fu mai!! khawnvartui stove hawh chawp in hostel piah tlang ah vawi khat dang chu kan chhum leh hram..kan puar leh viau bawk............

Hei le rawtuai

Hman ni chu hna lam pang a ka kal na ah raw hung hi alo awm a. Rawtuai a awm angem aw? tiin kan melh nghal vat a, pakhat alo awm ve a. Thlalak thiam tak ka nih lem loh avang in duh ang chuan a lem fiah vak lem lo anih hi.

Rawtuai hi a tuai hmasa ber hi a lian ber zel a, chuvang in lak dawn pawh in a tuai hmasa lam hi zuah hram hram theih a tha ti te pawh in an sawi ve thin. Chuti anih loh chuan a rua hi a kum tel in a te tawlh tawlh zel mai ani an tia lawm!!

Rawtuai hi a me viau e ti lo chuan , chakma chuan an lak lai te hian an zak zeh mai mai a, a me an tuar ve hran lem lo ni te pawh in an sawi.

Vawi khat chu Growmore Biotech nei tupa, Dr Barathi mau/rua chung chang vel ka sawi pui ve ngial tawh. Ani hian tissue culture lam a ei zawng in, North-east lam ah te pawh mau chi hi a lo supply ve nual tawh ani awm e. Mizoram chungchang bik ah chuan, mau tak kan tih ai hian phulrua kan tih ho hi commercially a exploit atan chuan a that zawk a rin thu a sawi. A chhan chu a len zawng (vollume) in ang rau rau ah phulrua hi a tak (mass) a tam zawk a, chuvang in transportation-cost a hniam zawk dawn a, paper-mill leh thil dang ah te thawn na man a hniam zawk dawn avang in tiin a sawi.

Tunlai in chanchinthar ah te mau hmang a siam, toothpick,agarbati kuang etc..te Mizoram lam a an siam chanchin ka chhiar zeuh zeuh. Heng mai bak ah hian kan mau/rua te hi ei zawn na tling khawp leh hlawk zawk a hman dan a awm thei angem?

Kan hotu te nen sahuan ah!!

Kumin nilai leh Beihrual thupui ah "kristiante leh Pathian thil siam dangte" tih ngaihnawm tak mai kan zir chhoh mek laiin, rem chang deuh maiin Ramsa lam la hmuh ngai vak loh hmuh na hun kan han nei hlauh mai a. Heng ramsa ho en tur hian kan hotute nen thlalakna nen meuh kan han thawk chhuak ve thei a, mit a tlai hle ani. Sahuan enkawl tu zing ami ah kan thianpa alo awm hlauh mai a, a ni in min han fan kual pui vel a , chu mai bak ah hriat ngai loh thil han zawhna hun remchang tak alo ni bawk nen!!

A hmasa ber in 'Lion Safari' tiin an ko mai a, motor darthlalang vel pawh thirlen a khuh bur maiin sakeibaknei en tur in an dahna hmun ah kan han tlan lut a. A taka han hmuh meuh chuan rin aiin a lu alo lian hle mai!!Fiamthu a lulian sawi nan an hman, a beng ah pawh khai ila a lu lam in a la buk rit zawk ang, an tih thin te pawh min ti hre chhuak zawk mai.A tai fek rat mai te, a awm pharh darh mai te , a kut tum chum buang mai te han hmuh chuan, siamtu hian insual chak tur liau liau in a duang bik em ni aw? a tih vawng vawng theih mai ka ti! Cowboy thawnthu a 'Texas kut tum chum biang buang, mu ke ang mai a an kak tha tawh hi chuan , buaina a hnai tihna ani' an lo tih thin te pawh min ti hre chhuak rum rum mai!!



A piah deuh kan han kal leh chuan 'hyena' an tih mai pahnih hi 'bar' phen atang in an rawn dak kar mai a.Sa thi ruang te pawh a ruh zawng zawng nen a ei vek thei khawp a ha tha leh khabe tha chak nei ani e , an ti a. Hotupa mafaka chuan " The God must be crazy, movie ah pawh 'hyena' hi a lan kha maw le" a han ti nghal thei mai a.Ka han ngaihtuah let chuan "ani awm tak e a!" tiin, naupang bo te reuh te in, thingbung chhip chhuan a' hyena' a hmachhawn ran lai mitthla ah alo lang a.Ramsa ah chuan 'hyena' kal lai hian ka nuih a ti za fu thin mai!! ke hma lam sei tak leh ke hnung lam tawi te si a, a han kal bu tlut tlut mai han hmuh hian,a nuihzatthlak zawng a ngaihtuah chuan a ruk a nuih var var a awl khawp mai. Mahse, siamtu in a tangkai tak tur a duan ani miau a, enge maw tak zawng a ei zawn na atan tangkaina a awm chek ang! hotupa fela chuan" 'hyena' hram ri hi mihring nui ri a ang e" a ti tlat pek bawk.



A piah leh deuh ah chuan tui lam sava an dah na hmun kan thleng leh a. Mizoram a sava ah chuan a sa tui pawl a an sawi 'bul lut' aia lian hret tur awm hi a chung lam an hung na a an hman thir kham ah hian an lo fu tlar tuar mai a.Mizopa rilru thin ah chuan "a khai.. khi a tuihang an fuk pui thap mai a" te pawh a ti mai thei. Mizoram lui dung a thingkung a lo fu tlar ni ta se la chuan, mi tam tak chuan silai emaw sairawkherh emaw keng kher lo mahse, lung tal in an la vawm thlawk peih in a rinawm.Kan hotute erawh chuan rem leh rem lo in, tih thlawh hlau tak chung si in, a mawi thei ang ber a thlalak tum in an thlalakna lens an herh rem sauh sauh mai nia! heng sava te hian hre thiam ve tak maw?


Vanneih thlak deuh mai in heng sava zing ah hian , TV vel a ka hmuh fo tawh leh a chanchin ka chhiar ve fo tawh 'swan' an tih hi a lo awm ve hlauh mai a.Tui a an han cheng kual dalh dalh han hmuh chuan , music composer lar tak Tchaikovsky an 'swan Lake' nalh tak mai a phuah chhuak te pawh hi, phuah chhuak awm tak a mawi ani e, te ka ti ve hial.Lal fapa siegfried -an ama mimal hmangaihna avanga nupui nei thei lo tur ni anga a in hria, a rilru hnual in zan a ramhnuai a avah chhuah na a 'swan' rual thlawk a hmu, a zui zel na atanga a thil tawn thawnthu ngaihnawm tak mai , music mawi em em a an han phuah chhuak te pawh hi, phuah chhan tlak a sava mawi anih vang te pawh a tel ve lovang maw?


Hetiang a sava thau mum kang mai leh lian tawk tak mai, boruak a an thlawk kang nul nul mai mit a han hmuh chuan, a mak ani tih bak chu han sawi chhuah ngaihna pawh ka hre lo. sava te deuh leh thla nei sei zawk te an han thlawk thei hi chu a hriat thiam awm.Hotupa mafaka chuan " an thla hi a tha em mai a, an thla hmul hi a chak in a phui bawk a ,chuvang a thlawk thei chu an ni ange" tiin a sawi a.
He sava thlawk lai ka hmuh chiah hian, vawi khat TV a varak chi khat thlawk lai ka en an rawn sawi zau na min ti hre chhuak zawk mai.Kha varak kha a taksa rih zawng te, a thla sei zawng leh hlai zawng te, a taksa pian hmang hrim hrim kha , science thiamna hmang a an chhut chuan, thlawk thei lo tur ani a, mahse a tak ah a thlawk ve miau si ani!! Thui fe a tlan a ,muang chang in a thlawk chhuak a, a tum lam pawh thlawhtheihna tum ang mai hian thui ang reng tak a tlan leh bawk. Siamtu them thiam zia hi science hmang a chhut chhuah vek phak anih loh zia min ti hre chhuak zawk mai nia!! 'Swan' erawh hi chu tlan lo in a tui chenna atang in a thlawk chhuak nghal tawp thei.


A dawt leh ah sakei var kan han en leh a. min hruaitupa chuan sakei dang ang tho anih zia te, 'melanin' an tih mai a neih tlem avanga rawng var anga lang ta mai anih zia te, sakei dang nen an inthlah pawlh theih vek thu te, mihring ah pawh taksa a vun var bik nei te pawh hi 'melanin' vang ani tih te an sawi chuan ; ennawm mak tak thlir a , kan tlir vauh vauh ringawt tur kha , mahni in ring tawk tak in kan thlir phah a, a lawm awm khawp mai.

Thau mum nalh mai, hippopotamus te pawh a nung chung in kan han hmu a, a beng a tui lut thei lo tur in a khar thei tih te,tui hnuai a rei tak chaw zawng a a awm theih thu te hriat ve nual hnu a , a tak a han hmuh chu a ropui danglam ve tlat.Min hruaitupa hnen ah "a sa an ei ngai em?" ti a ka zawhna chu a hriat bik loh thu in min chhang a."A vun duh vang tal chuan a ruk a kap thin an awm lovang maw?" ti a ka zawh belh na chu,"awm mai thei ani" tiin min chhang leh.Ka hmelhriat pakhat in South Africa a zin tum a, a sa ei , an hrilh lawk miah loh, a ei zawh tawh hnu a 'crocodile' sa ani tih a hriat leh a ten leh si zia te han hriat chuan, Hippopotamus sa ei tawk pawh lo awm se la, mak tih avang chuan ka au vak lo in ka ring! hring nun ' culture 'in ang lo leh chaw duh zawng in ang lo tam tak awm na ah hian!



A vaia han tarlan dawn chuan a sei lutuk dawn.hotupa mafaka'n chip chiar zawk in a la rawn ti tho tur ah ngai ila. Sahuan kan fan zawh a chhun chaw te kan fak hnu chuan, haw zai te kan rel ta a. Hawn kawng ah MCC a awm tih kan hriat chuan, kan mizo zirlai te tlawh pah in , a hmun hma te han fan ve hrim hrim kan rel tlang ta a. A hmun chu kan hruaitu fel tak tak tetea leh sanga'n min fan pui a ,a bengvar thlak in mit pawh a tlai khawp mai. An campus hi alo zau fu mai a, tin thingkung buk tha tak tak a la tam khawp mai a, khaw lum lutuk tur pawh boruak a ti dai ang reng khawp in a hriat. Tin, sava te leh sakhi rang (spotted deer) an tih mai te pawh bul lawk lawk ah an tla lai hmuh tur ala awm. A awm tam ber erawh, mi thiam ten 'homo sapiens' an tih ang hi an ni a, heng ramsa, thing leh mau zawng zawng chung a thunei tu tur a Pathian in a ruat ,amah ang tak a a siam te!
Mi te anga hmaifang tha leh keu phek phuk ni ve mah suh ila, ani hi chu thluak aia tihrawl ngah chi ania, rawn tlak vak ni mah suh se khual nek ah a tha a, an tih ang han ni tur in taksa mawi em em nei ve mah suh ila, a hmun a hrin mawi em avang in MCC campus kawng ah hi chuan kan hmet ve ngam tur alawm , tia mahni in thiam chawp chung in thla te kan han la ve ta ngawt a.

kawngpui

He kawng hi ka zawh a piang hian rual awh ati na ve thin. Mizoram tlangram ang ah te chuan a harsa ang tih a hriat. Mahse an siam lai vel hmu ve tu tan chuan an siam hma leh an siam zawh hnu a, a dang lam na hi a ngaihnawm khawp mai.Hemi kawng hi Chennai- bangalore inkar kawng ani a, kawng pui an siam hnu a, vehicles in fuel a hman tlem phah na te, 'wear and tear' an tih mai motor kawng that loh avanga a rawih phah na lo tlem ta te, tin, mahni thlen duhna hmun hun rei lo zawk a lo thlen theihna te hi sum in chan tir dawn ta ila a tam ve viau mai thei ani!!
chu mai bak ah, a kawng tawn tawn a ram te hi a hlut na a san phah viau a, restaurant (dhaba) a pung nasa a, chung avang te chuan inhlawhna/hnathawh tur alo pung ve zel a.
Chennai port a thil thawn chhuak duh tu te tan lah a lo zia ani chek ang chu, thil rit lam export chi (granite company) te pawh in rawn in bun thar in, he mi kawng kam ah hian an rawn in din thar sup sup mai nia.

Mahse, hei toll gate a awm vang mai le!! motor, hemi kawng a kal te chuan pawisa an pek angai, a kawng hmang tur hian, hei hi sawi sel a hlawh ang reng fu, a chhan chu construction- man ber an hmuh let tawh chuan maintenance -man chu fuel etc vel -cess ah an khawn vek tawh a , khawn leh enge a tul na ti tawk an awm!! mahse toll gate a thawk tur hian sipai bang an hmang a, training an pe tha ani chek ang, an hawih hawm ang reng fu!





hei 'hyundai' lam pawh in vung thar an chhuah anih hmel e!




han kal zel in vellore lam pan duh tan pawh a zia sawt hmel ta mai!
chuan hei Relience petrol bunk te pawh an rawn din ve ta luah mai!!A piah a in ding saw restaurant tha ve tak, zin mi ten,chawlh nan an hman pah a, an fuel an lei sak duh na tur a an siam anih hmel e! A ram an lei tan tirh hian buaina an tawk nasa ve ang reng a, surveyor- ho hruai in ,measuring tape, leh chain survey nen meuh ka teh chhuah pui ve ngial mai!!India ram dan kan neih tam tak hi mahni in hai vur nan a hman tum tan chuan kaw pawp a va lo tam em!! tih te ngaihtuahna min neih tir ve.
hei hian eng lam ber nge maw ni a phurh tak le?


Hetiang ang kawng ah hi chuan, mizoram lam a kawng sir a tlan liam, kawng kawi a inhmuh lawk loh vang a insut ang chi hi accident na ani vak lem lo khawp mai. A chhan chu a kawng design tu te hian, Driver an mut thluk loh nan a kawng kawi dan tur tawk vel te hi an duang tel thlap a, tin plateau(tlang chung zawl) mah ni se , hma lam a mi te thui tak hmuh theihna tur in an duang lawk a. Mahse accident na chhan tam ber chu, hnung lam light eng nei lo, motor tlan chak tak in a hmuh loh avang a hnung lam atanga a sut na hi anih teh tlat chu!! heng lai hmun a ka awm ve lai in zan khat chu kan su ve tep, mahse siamtu hun ruat ani lo ani ange, driver in a herh kawi hman hram!!

Kan dam tlang em?

Hun tawng avang nge ni a, thinrim hrikthlak na hmun rem chang tak anih vang nge ni anga, mahni identity thup theih ve ang reng tak mai-anonymity ti a an sawi thin awm na hmun anih vang nge ni anga ? Hmaichhan a kan phawrh chhuah ngam loh, kan rilru luah tu sawi theihna rem chang anih vang nge ni anga,a chhan thil dang a awm zawk tih erawh chu ka hre chiah bik lova. Mahse, website/forum/blog etc vel a kan comments tam tak chhiar hian ka rilru ah thil rawn lang zawk thin a awm.

Mihring nih chhung chuan thil pakhat ah pawh ngaihdan leh duh dan chu a thu hmun reng thei lo anga. Mihring chawr chhuahna hrang te leh hnathawh hrang, thenkhat te chu zirlai te kan nih a rinawm a, chu mai ala ni lo hmun hran hran a awm, kan thil hriat zawng leh duh zawng in ang lo tak tak te kan nih a rinawm a. Mahse, a tlangpui a thil pakhat a kan comment tam tak te han thlir hian , kan ngaihtuahna hi a ‘negative’ ta lutuk em ni aw? ti te in ngaihtuahna ka nei ve fo mai. Kan ram kal phung te leh ram hruaitu te ,kan khawtlang hruaitu te, thil thleng te reng reng hi kan comment dan en hian a in deuh sawh zawng ang chi hi comment a tam lutuk em aw? eng vang nge ni ang? Hetiang ang tak din hmun ah hian kan ding mek tihna nge ni anga, keimahni kan inhmuh dan hi a ‘negative’ lam zawng hi kan in hmuh sak nasa lutuk zawk? Nge ni anga IT thang chak tak mai hian, thil thar min hriat tir teuh mai a, hnam dang leh ram dang te chanchin , kan lo hre zung zung ta a, chu chuan rualawhna nasa tak min neih belh tir zel??

Hringnun ah chuan lungawina famkim nei thei chu mi tlem te chauh an awm a rinawm a.Mi thenkhat te phei chuan hetiang tak a awm tur hian mihringte hi Pathian in a siam a ni zawk, lungawina famkim neih theihna Pathian lam kan pan na tur in, ti te in ngaihdan an vawrh chhuak ve bawk.

Thil eng pawh in kan lung a dum loh a, her danglam ngai a awm chuan, kan ngaihtuahna atanga tha zawk kan hriat leh a her danglam dan tur te , a siam that dan tur te rilru ah vei tel ta ila, kan hlawkpui awm mange aw! tih te ngaihtuahna ah a awm. Hmun hran leh hna hrang hrang thawk te kan nih hmel a, kan dai hriat na atanga kan hriatna te hmang in kawng tha zawk leh midang te pawh in hlawhtling zawk a an lo kal pui dan te , thawh khawm ta ila!

Logical Interpretation!!

Thing tereuhte!

Tlai khat chu, in chung zawl ah kan lawn a, kan hawi kual vel a he thing te hi alo awm ve tlat mai a. Mizo in hmawng kung kan tih ang hi anih duh hmel mange aw, ka ti a. Heti hian rem leh rem lo in, brick leh cement kar ah lo awm ve tek tek a. Siamtu hian an chi a mang mai loh nan te, hmun khat a an awm khawm huk loh a, an darh zau ve nan te hian, heng thing chung ah te thleng hian ava lo duang lawk thiam em!! tih te ngaihtuahna ah a awm.

A hmawng kung kha alo rah a, a rah chu sava ten an lo ei ta a, a chi kha an e chhuak leh a, hetiang hian an lo darh ta ni awm tak ani a. He mi thlalak a hmawng kung hi chu khawih chhe miah lo pawh ni ila, rah chhuah thei tur khawp chuan a thang lian thei lo mai thei,mahse engemaw zah chu thing kung pakhat rah atang chuan ,rah chhuah thei khawp a thang puitling an awm chek ang chu!

In enkawl tu te tan chuan hnawk sak mai anih hmel a. A tet vang ngawt erawh anih hmel bawk si loh, mihring ten a to na tur hmun awm anga kan ngaih loh lai ah a to a, mihring te enkawl a hlawh lem lo bawk nen, hnawk sak alo ni ta mai ni awm tak ani. A piah leh deuh chu ka han hawi leh a....


Thingkung lian tak thleng a thang chho thei tur tho ang chi hi, rah chhuah thei khawp in an thang ngai dawn lo ani tih hriat tak mai hian, te tak te hian thingkung lian tak kung ang mai hian an lo bawr laih a. Hei erawh mihring in a duh tak a a phun leh enkawl chhoh anih bak ah, mihring nun ti hlim tu tur atana duan anih avang in hnawk sak ani ve lem lo in a hriat lawi si.

Thingkung chi hnih, to na in hnaih te pawh , mihring tam ber te rilru ah chuan an dinhmun ava in thlau tak em!! tih te ngaihtuahna ah a rawn lang zawk thei nia! Heng thingte hian an to na tur hmun ah hian duhthlanna an neih a rinawm loh a, amah erawh chu an to na hmun hian mihring ten kan ngaihhlut leh hlut loh ah kawng ro nasa fe in a su in a hriat bawk si. Thingkung theuh theuh to chhuah na hmun dang lam avang ngawt in an din hmun a va inthlau teh lul em!!

Lehkha zir nasat avang te, theih tawp a rilru seng a hma sawn tum a beih avang te, dik tak leh taima em em a thawh nasat avang te a, heng thing kung te hian , an to na hmun hi han sawn thei ta teh reng se la chuan, thi leh thau pawlh in an ti duh angem? Rah chhuah thei khawp a than len theih na hmun thleng tur in , eng tiang chiah in nge an beih nasat theih anga, thingkung lian awm sa ten a dip ral tho mai angem?..tih te pawh ngaihtuahna a siam ve.

Han ngaihtuah tak zel ah chuan, hmawng kung hi chu, khuanu in a lo duan dan anga tun din hmun hi thleng chho ta angah pawh han ngai ta ila, hemi hmawng kung hian kan hla phuahtu pahnih te hnen ah chuan thu hran a sawi daih thung in a hriat!!
Pakhat in "hmawng ang ka pem lo na nge , Lalawithangpa belhngai Laldanga ka then thei lo" tiin mi pakhat lak a a rinawm zia sawi lan nan hmawng kung anga pem a tum ve loh thu a han sawi chhuak a.
Pakhat ve leh chuan, hmawng kung , thingkung dang a to in, alo rei chuan a than hnan a, a zem chial ang hi teh khin in " Mahse maw ngaihzual i zun zam in, zaman hmawng thing ang mi phuar vel a" an ti daih mai a, hmawng kung tho kha , a pem thin anga an sawi thin kha dah lang sar lo in, thingkung a zem chial na thin lam kha rawn dah lang sar in, mi dang lak a a rilru ngheh zia rawn sawi lan nan tho a rawn hmang ve leh ta thung!!

Kan hla phuahtu pahnih te hi an to na mual a dang ve te pawh ani ange, hmawng kung an hmuh a , an dah lan sarh duh zawng a in ang tlat lo. mahse an to na mual hi hmun dang ah sawn lo duh ta se la, theih tawp in bei bawk se la chuan, thingkung ang lo tak mai in an hlawhtling thei tlat.Siamtu hian mihring te thil nung dang te aia a dah san na a ti lang thar leh zual hle mai, kan ti thei awm e!