Friday, April 30, 2010

Chakai khawrh kawr

Hnathawh ni chuan nitin a hmel hmu tur ka ni, mahse ka hmu ngai lo. Ka awm na thin a awm ve thin ngei tur chu ani bawk si.Damloh na leh theih lohna vang te anih ngawt loh chuan nitin inhmu thin tur kan ni, mahse a hmel a rawn lang ngai si lo....

Rin loh tak mai in kan ti dawn nge, beisei ngam tawh loh hnu ah nikhat chu a hmel a rawn lang ve hlawl mai a. Kan thawh ho na tur hmun leh a thawmhnaw hak chu a inmil hlawl lo. Hnathawk tur a in atanga rawn chhuak chu ani chek anga, mahse a hnathawh tur leh a incheina kha a inhmeh mawlh lo ani. A sam a rawn zuah sei nghuau mai a, a tuak ala awm phauh phauh zui a. A sam han en reng reng khan sahriak leh samkhuih vel chu a tawng khat ani tih hi a hriat hliah hliah mai a. A hmui hmul leh khabe hmul vel te chu uluk vak lova meh thuak thuak ani tih hriat tak mai hian a la lawr deuh phiar phuar a.A han tawng zawng te chuan a ha kar a kuhva ei na dum te chu a lang thei a, a han thawk zawng te chuan zan lam pang nge zing lam pang chu a hriat theih loh a , a thil in rim chu a rawn nam deuh huk huk bawk a.
Chakai khawrh kawr an tih ang hi a ha a, kekawr bul a ha bawk a. A inthuam dan leh a hmel han en chuan huan a kal tur anih loh vek leh sangha man tur a lui a kal tur ni mai awm hi ani roh a. Mahse kan awm na a hnathawk tur chuan a rawn kal ve miau bawk si ani.
Rei lo te kan in biak zawk hnu ah ama room lam ah hna thawh tur nghak in a kal sawn ta hrih a. Chhun thingpui in alo hun a, mi dang in thingpui leh a hmeh an han hlui chuan ani chuan ..
"Rakzu lo chu ka in ngai lo" tiin a lo hnar ta mauh mai le.A pe tu lah a hrilhhai a, engtia han biak zui zel tur nge tih lah hriat a har!!
Kan han awm ho ta zel a,Kar khat kan han awm ho hnu chuan amah ah danglamna nasa tak hmuh theih in a rawm awm a. Nu ho leh hmeichhe lam pang in an fuihna avang ani teh reng ang chu, a sam te chu rawn met fai in, a khabe leh hmui hmul te pawh chu a fai thin ta viau mai a, thawmhnaw pangai kamis leh kekawr tlawn nawh mar tha tak hian a rawn kal ta ziah mai a.... zan lam a thil in rim pawh a nam hriat tur a awm ngai ta reng reng lo mai bawk a. Kan inhmuh hmasak ber a arawn hak, chakai khawrh kawr leh kekawr bul chu engtik hun ah nge a hak thin tih ka zawh chuan, hnathawh nan leh lui a kal chang in a hak thin thu leh, vanapa hall hnuai a mi a lei anih thu te, THIL a in thin chu a duh phawt chuan treasury square leh zodin in kar ah engtik lai pawh a lei tur a hmuh thu te min hrilh tel bawk!!
Hringnun hi kan khawsak pui te a zir hian kan awm dan hi ava lo danglam nasa thei awm em ve le aw..tih hi a hmel hmuh a piang hian rilru ah a lo lang zawk thin mai nia.

16 comments:

Sekibuhchhuak said...

A ngaihnawm e. Awm zel tur ani em?

illusionaire said...

True story a mi? A ngaihnawm khawp mai.

PimPom said...

Khapa bawk khan te han tih zawm ila.ha....ha...ha..
True story a ni em hriat ava chakawm vele.

virgochhas said...

mi thawnthu ziah i ron post nge nangma, mimal, private a i phuah chhuah ve ngat? :D

ni e.....kan khawsakpuite azir hian kan nundan mai bak ah kan rilru ngaihtuahdan hmang pawh hi a dang thei ngawt asin

David Ralte said...

Dik khawp mai, kan chenpui te hian kan hringnun kar fung hi thui tak an lo control reng msi nia. Uisa ei duh lo bula kum 10 chuang kan tal chuan Uisa ei lam a lang mawh khawp mai.

Sahriak leh Samkhuih erawh, nang zawng, i hmang tangkai thin tih i Passport size photo atang pawhin a hriat :D

avena said...

seki/pimpom/vc/illusion/david true story chu ni e,vawiin thleng in kan la thawk ho va,thil tih ho na ah pawh a tlawmngai ber pawl ani thin asin.a chanchin min hrilh zel dan chuan a nupui alo sun tawh a,a lung a phun na pawh ala rei lo hle ani awm e.

Varte said...

Thawnthu i ziak dawn emaw ka ti a, a tawp hma leh ang reng bawk si..!!!!

A hna chu a pawimawh vak lo em ni chutia hun rei tak a rawn lan loh vang vang mai le???

Tuna a khawsakpui te chu mi smart tak tak in nih hlawm ka ring tlat..

avena said...

varte: a hna chu pawimawh e.Mahse, "aikal' an tih ang chi hi akal tir thrin hi alo ni a.
Mi smart tak tak ni tur a min ring hrim hrim pawh kha a lawm awm hle mai! vur leisak chu i phu hrim hrim ani :)

Te-a Colney said...

A ngaihnawm khaw mai a.

faka said...

Eng eng emaw hi ngaihnawm angreng taka ziah hi i thiam fu roh mai hotupa! Chu chakai khawrh kawr hatupa ngei chu ka rawn kal leh hunah hmuh ngei ka duh ang:)

avena said...

te-c/faka
ekhai in lo chhiar chhuak peih a lawmawm hle mai. Hetiang neuh neuh han ngaihtuah hian hringnun ah mi chi hrang hrang kan tam zia te pawh a ngaihtuah chhuah theih a lawm maw le!

Anonymous said...

A tawpah chuan nangmah ang main a lo smart in a lo inkhuih pial ta than a ni maw? I bul velah awm te hi i inspire nasa thei awm ngawt mai!

A ngaihnawm reuh khawp mai.

- bmw

Te-a Colney said...

Ziak ngaihnawm ve le, a dang pawh rawn thawh zel teh.

Pu.Speaker said...

puak tha fu ni

avena said...

Pi BMW..ekhai i rawn lang ve leh hlawl a lawmawm hle mai..tea colney and pu speaker..nia han phul hlut chang te hi a awm ve leh thin alawm maw le...!!

digimalt said...

huh... inveng weekly chanchin phek amin a ni maw :D