Wednesday, January 23, 2008

Thing tereuhte!

Tlai khat chu, in chung zawl ah kan lawn a, kan hawi kual vel a he thing te hi alo awm ve tlat mai a. Mizo in hmawng kung kan tih ang hi anih duh hmel mange aw, ka ti a. Heti hian rem leh rem lo in, brick leh cement kar ah lo awm ve tek tek a. Siamtu hian an chi a mang mai loh nan te, hmun khat a an awm khawm huk loh a, an darh zau ve nan te hian, heng thing chung ah te thleng hian ava lo duang lawk thiam em!! tih te ngaihtuahna ah a awm.

A hmawng kung kha alo rah a, a rah chu sava ten an lo ei ta a, a chi kha an e chhuak leh a, hetiang hian an lo darh ta ni awm tak ani a. He mi thlalak a hmawng kung hi chu khawih chhe miah lo pawh ni ila, rah chhuah thei tur khawp chuan a thang lian thei lo mai thei,mahse engemaw zah chu thing kung pakhat rah atang chuan ,rah chhuah thei khawp a thang puitling an awm chek ang chu!

In enkawl tu te tan chuan hnawk sak mai anih hmel a. A tet vang ngawt erawh anih hmel bawk si loh, mihring ten a to na tur hmun awm anga kan ngaih loh lai ah a to a, mihring te enkawl a hlawh lem lo bawk nen, hnawk sak alo ni ta mai ni awm tak ani. A piah leh deuh chu ka han hawi leh a....



Thingkung lian tak thleng a thang chho thei tur tho ang chi hi, rah chhuah thei khawp in an thang ngai dawn lo ani tih hriat tak mai hian, te tak te hian thingkung lian tak kung ang mai hian an lo bawr laih a. Hei erawh mihring in a duh tak a a phun leh enkawl chhoh anih bak ah, mihring nun ti hlim tu tur atana duan anih avang in hnawk sak ani ve lem lo in a hriat lawi si.

Thingkung chi hnih, to na in hnaih te pawh , mihring tam ber te rilru ah chuan an dinhmun ava in thlau tak em!! tih te ngaihtuahna ah a rawn lang zawk thei nia! Heng thingte hian an to na tur hmun ah hian duhthlanna an neih a rinawm loh a, amah erawh chu an to na hmun hian mihring ten kan ngaihhlut leh hlut loh ah kawng ro nasa fe in a su in a hriat bawk si. Thingkung theuh theuh to chhuah na hmun dang lam avang ngawt in an din hmun a va inthlau teh lul em!!

Lehkha zir nasat avang te, theih tawp a rilru seng a hma sawn tum a beih avang te, dik tak leh taima em em a thawh nasat avang te a, heng thing kung te hian , an to na hmun hi han sawn thei ta teh reng se la chuan, thi leh thau pawlh in an ti duh angem? Rah chhuah thei khawp a than len theih na hmun thleng tur in , eng tiang chiah in nge an beih nasat theih anga, thingkung lian awm sa ten a dip ral tho mai angem?..tih te pawh ngaihtuahna a siam ve.


Han ngaihtuah tak zel ah chuan, hmawng kung hi chu, khuanu in a lo duan dan anga tun din hmun hi thleng chho ta angah pawh han ngai ta ila, hemi hmawng kung hian kan hla phuahtu pahnih te hnen ah chuan thu hran a sawi daih thung in a hriat!!
Pakhat in "hmawng ang ka pem lo na nge , Lalawithangpa belhngai Laldanga ka then thei lo" tiin mi pakhat lak a a rinawm zia sawi lan nan hmawng kung anga pem a tum ve loh thu a han sawi chhuak a.
Pakhat ve leh chuan, hmawng kung , thingkung dang a to in, alo rei chuan a than hnan a, a zem chial ang hi teh khin in " Mahse maw ngaihzual i zun zam in, zaman hmawng thing ang mi phuar vel a" an ti daih mai a, hmawng kung tho kha , a pem thin anga an sawi thin kha dah lang sar lo in, thingkung a zem chial na thin lam kha rawn dah lang sar in, mi dang lak a a rilru ngheh zia rawn sawi lan nan tho a rawn hmang ve leh ta thung!!

Kan hla phuahtu pahnih te hi an to na mual a dang ve te pawh ani ange, hmawng kung an hmuh a , an dah lan sarh duh zawng a in ang tlat lo. mahse an to na mual hi hmun dang ah sawn lo duh ta se la, theih tawp in bei bawk se la chuan, thingkung ang lo tak mai in an hlawhtling thei tlat.Siamtu hian mihring te thil nung dang te aia a dah san na a ti lang thar leh zual hle mai, kan ti thei awm e!

10 comments:

Puia said...

Hotupa nge nge Hmawngkung hmangin zirlai kan tan leh thei a, a ropui thin e. Heng i han tehkhinthu te hi home work uluk taka beih hmasak chi a ni a, keini ang rual tan chuan. Lalawithangpa atanga a hla han in zam kual dan vel phei hi chu uluk taka chhiar hnuah zankhuaa ngaihtuah zeta tuihnih chauh chi a nih hi mawle..:)

faka said...

E khai, hmawng kung ringawt pawh kan hotuten in han 'analyze' tak tak chuan philosophy ril tak a lo pai reng mai! Samdala leh Newton-a, thei kung hnuaia thu ve ve an inan loh si dan ngaihtuahin, hmawng kung hmu theuh theuh hi a lo inan loh theih dawn khawp mai:)

"Mahse maw ngaihzual i zun zam in, zaman hmawng thing ang mi phuar vel a" tih lai tak hi he thing i hmuha i rilrua lo lian ber chu a nih hmel a. I veh kual thui ang reng, te chu ka lo tia:))

avena said...

hotupa puia leh mafaka...ani khawp mai...

hmawng kung in a thing an zam chuat lai hmuh tirh chuan a mak ka ti ka zawt chhen ve reng asin!!

Bangalore lam te leh lam lo deuh te pawh an han rik tak laih laih chuan , rilru a awm lam chu in rawn sawi chhuak phwang mai alawm..

hotupa puia chuan Awithangpa hla a rawn tuihnih a, hotupa mafaka erawh zawng ..pu vankhama hla rawn tui hnih tlat mai a :-))

Zara Ralte said...

A LANNA TLANGDANG ATANGIN:Ti hian ka lo ngaithuah ah LDP-i hla ah khan "awm loh na tur ah ka awm in k atih loh tur sual ka ti thin" tih hla leh i thilpost hi a in hmeh khawp mai. Heng hmawng te hi an awm na tur ni awmzaw tak chu in leh a vel ah ni lovin ram lam ani hmel si a:)A pic chung zawk ami khi a awmna lo tur ah a awm avangin hnawksak mai mai alo ni ta a Kristian chu ni phei se thil ti suak a ni der dawn anih khi!

Ahnuai a mi bonsai erawh hi chu environmentalist tak tak (a hming mai a inla environmentalist/animal activist ang chi mahni hman tur anih chuan ram hnuai thing leh mau suat pawisa miah lo leh,animal activist in tia an sa ei leh duh tho ang chi te nilovin)tan chuan ngaimawh tham ani. Ti hian bonsai turin a tiak kan la khawm a, mahse siamtu hian thang lian zel turin a siam si a, an thanna tur an zung leh zik te kan tan chhum sak zel a, an duh lo chung Jail chhunga kumkhua a zalenna hmang thei tawh lo tura khung hmiah ang anni.

Tak taka...i thil post hi a ropui hle mai, heng thil mawlte te ni a kan hriat mahse a ti mi hovina thu leh hla nena in han bawl phawn suah tawh hi chuan a hnung lamah hian phillosophy ken tel a nei tlat thin.

avena said...

zarbawiha...ekhai i rawn sawi tha hle mai.Mihring te hian thil pakhat ah hian kan ngaihdan te, dik kan tih leh tih loh te, kan hmuh dan hrim hrim te pawh hi a in ang thip thlep kher reng lo anga. chuvang tak chuan tlang dang atang i han thlir na ang hi pawi mawh deuh ani.\\

environmentalist i rawn phawrh chhuah te pawh hi ngaihtuah tham tak ani!! kan naupan lai hian , mi pakhat hian ram zau tak a nei a, a ram chhung a sava chu perh phal lo in a hum halh nasa em em a, mahse 'tuklo' sava rah tlan chu mi dang huan ah chuan kan perh tlang leh vek lawi si!! mak deuh ani.. a bak chu hei kan hotute hian an thil tawn atang in an la rawn sawi belh tur ah ngai ta ila!!

sawmpuia said...

Hmangkung ringawt atang pawn pulitzer prize dawng thei awm a mawi a ni. A ngaihnawm khawp mai.

Hmawng rah pawh hi tlantu sava an awm ve thin a, kan naupanlai deuh chuan heng savate hi kan veh ve fo thin. Hmawng pawh hi amah mai a awm chuan a khua a har ve hle ni tur a ni, a to na mual chu engpoh lo nise. Tichuan Siamtu chuan a lunglenna te hnem turin sava a va tir a, chung sava te chuan hla mawi tak tak an sak sak a, hmawng pawhin a rah tui tha tha a lo hlui bawk a. Chutiang chiah chuan mihringnun hi in mamawh tawn kanlo ni.

Nangpawh hmawng ang mai a i awm kurh kurh kha sava hram thiam tak M.Nagar nula hi i angchhung muanna ah chuan han la lut thuaila tichuan tihfamkimin i awm ngei ang. He thuziah awmze nei tak hi tizawng i ngaihtuah atang a lo piangchhuak ngei a ni tih ka hrechhuak ta :-)

sawmpuia said...

Ps:_ A background a music i han tih te pawh hi tlangval lai hun tawp lam hmang a tun hma hun han ngai leh hnuhnawh music a ang khawp mai :-)

avena said...

sawmpuia..a ni khawp mai.tuifinriat mawng ber a thil awm thleng a siam tu hian, a thil siam te a duan dan hi a ropui ani..

'mihring choh lo chu zirtir an ngai lo' tih hla te hi a dik fu hian ka hre thar thin. hmanni chu Durtlang kan ram vel a ,kan naupan ve lai a chawngzawng sava a tam theih thin zia te, tlaiberh te leh vaki te pawh hmuh tur awm ve zauh zauh thin te, nikum ka haw chuan hmuh tur awm ta miah lo mai te , kan titi na ah kan sawi chhuak a, thil hi ava inthlak danglam chak tak em!!

M.Nagar nula lam chu han sawi fel thuai teh, telugu tawng thiam ve ve in ni bawk sia, in inhmeh dawn tak tak ania, a nu leh pa te chuan 'sawmpuia kher lo chu' an ti deuh bur tawh tih te kan lo hre thar zel a, a lawmawm e :-)

Mozart said...

Dula, Blog i va lo nei ropui ve!

avena said...

Mozart.. ropui na awm em ni?? mahni ngaihtuah na ang ang , hei kan hotute puia, mafaka, sawmpuia leh zara te ho in an lo chip zui atan ka han pho lang ve tawp zel mai anih hi!!

han thawh ve rawh le!!