1991-92

Thlasik lai ani a, tlai ni tla tur in bang vel chu a rawn chhun eng deuh phat a. Thingpui in a kan thut khawm thap lai chuan , vawi leh khat ah music hi a rawn ri dup dup mai a, music ri chu a hnaih tial tial avang in motor atanga lo chhuak ani tih a hriat theih a, chutah kawt ah motor in hung ri deuh dawt rual chuan music pawh chu tawp zui ta in, car kawngkhar hawn a khar leh nghal ri in a chhunzawm nghal a.

kawngka pui chu rawn in hawng in, mi pakhat hi a rawn lang hlawl mai a. jeans kekawr pawl , da lam lek lek tawh hi a ha a, a ipte hma lam ding lam ah chuan car chahbi a khai lang a, vei lam pang ah cell phone khaina hrui a uai thlak tir bawk a, baseball cap a khum a, T-shirt var ha in,a chung ah jacket uk a ha , a han tawng zawng a rim atang chuan ‘zarda’ a rawn ei ani tih a hriat theih a. Tin, a hla te chu internet atanga a download ani tih te a sawi luam a, Mp3 a hla sang chuang a neih tawh thu te han hriat a, a computer ah TV en theihna a vuah thu te, TV programme a record theih thu te han hriat zel phei chuan , kan zoram khawvel hian kum sawmhnih vel chhung lek pawh hian , thil thar ava hmu hnem tak em tih rilru ah a rawn lang zut zut mai ani.

Kum 1986 , mexico world cup te kha chuan Bangladesh Tv channel a an rawn pek kha kan hmuh phak ani deuh mai a, doordarshan lah kha aizawl ah pawh veng thenkhat te chauh in an hmu thei a. cable tv te awm hek lo le, TV antenna kha hmun sang lai ah dah alo tul a, a fiah loh deuh hlek khan naupang ni ta chu antenna her a ngaih chang a tirh ngun ber kan han ni ta ziah mai anih kha, ral khat a mi her anih miau avang in , ring tak tak a au angai a, a enge maw zawng chuan a nuam phian!!

Sap-film anih tawh phawt kha chuan ho te te pawh kha kan en peih deuh vek mai, a dang awm tlat hek lo. A then te kha chuan ‘chitraahar’ te ‘ek-do-tin-char’ tih te pawh tuipui viau an awm. Nilaini zan apiang hian dar 8:30 ah, Bangladesh-TV ah sap –film hmuhnawm deuh hlek an pek thin avang in kan nghak hlel viau thin, MacIver,knight-rider, tih vel te ani ta in ka hria ! Tunlai ang in reality show te ala awm lova, kan ngaihtuah thleng pha lova, reality show en chak na pawh a piang lo bawk, mahse kan hlim pui viau tho.

Cable TV ala awm miau loh avang in kan chanchinbu a, music column ziak tu te pawh khan , sap ram ah chuan Mtv te hi darker 24 chhung en tur an nei a, a awh awm zia te an ziak thin a, ngaihnawm ti tak in kan chhiar thin.

Chutah krismas a rawn hnaih a piang hian ‘Boney-M’ hla hi a lar thar ziah emaw tih tur hian an zai ri hi bazar vel ah te pawh hriat tur a tam thin khawp mai. Siampuii sailo leh Lalsangzuali Sailo zai te kha, krismas ruai fatu ten au rinna hmang a an play lar pawl tak ani ta awm e!

Kum 1991-92 , a rawn her chhuah meuh chuan, mizoram ah pawh cable Tv a rawn awm tan a. Durtlang a doordarshan TV in , TV centre an bun pawh an hmang tan a, mahse a lem a chiang hlei thei mang tlat lo mai, mihring te kha an lang phir a, thlarau ni awm tak tak kha mihring thla a lang tel ve zel bawk a, en a nin awm em em. Zawi zawi in cable TV chu a lar chho zel a, tunhma channel 2 vel chauh en thin khan, channel tam tak Mtv tel in kan lo hmu ve thei ta, a hmu phak te khaw hawi chu a ti zau sawt ang, chutih rual in thil thar kan hre thar a, ‘awh’ tur thar te pawh kan hmu in kan hriat belh teuh bawk!!

Kum 1991-92, hian vawi khat chu aizawl town bus ah , sikulpuikawn atang in ka chuang tan a, ka bul ah hian PC girls sikul hmeichhe naupang pahnih , kum 8 mi vel awm hi an thu ve a, an inbia chu ka ngaithla reng a, November Rain- Guns and Roses , nalh an tih zia te, Axl Rose zai thiam an tih zia te chu an sawi dun bawrh bawrh a. ka han ngaihtuah a, a hma kum lawk 1986 vel ah khan kum 8 mi ni ta se la, kha tih hun lai a sap hla lar kha an tuipui thei angem ?? an hre hrim hrim angem?? Tih te rilru ah a rawn lang a. A hnu ah kan thianpa chhungte in ah chhun thingpui in in kan chawl a, chutah chuan mipa naupang kum 3 vel mi awm hi alo awm a, ani pawh chuan ‘stand for what you believe-poison’ kha ahan sa lang lang a, ani pawh hi a hma kum lawk, Mizoram a Mtv kan en theih hma ah khan kum 3 vel mi ni ta se la a ‘stand’ tih hla ang te hi chu a sa thiam lo mai ni lo in a hre kher lo ang!

Tlang dang atang in han thlir ila, PC Girls sikul hmeichhe naupang te, mipa naupang kum 3 vel mi te hian, heng ‘november rain’ leh ‘stand’ tih te hi , an zirlai bu a ‘poem’ ni ta zawk se la, an exam na ah ziah chhuah tur ni ta ang se la , Mtv ah an sak hmu miah lo bawk se la, eng ang in nge heng hla te hi an hmuh ang?? An nin thu te, Axl Rose a hla phuah sei lutuk tul lo an tih thu te , an sawi daih ka ring!! Mahse, Mtv ah an zai lai tui tak in an lo thlir thin miau a, a hran a –memorise tum a beih ngai lo in an hre chhuak vek thei tlat.

Hemi hnu deuh ah internet te rawn chhuak in, Lengpui Airport te kan lo nei ta bawk……..