...???...

Hun awm se la, hmaichhan a sawi in a tuiawm zawk ange han ti dawn ila, thusawi chi vak ka ni lo tih ka in hre ve bawk si. Mizopa tapchhak a thu kual in zawhte leh pum te nen han thu kual pat mai ila, sawi tur chu ka lo hre chhuak ve teuh mai thei asin maw le……

Ka han ngaihtuah vang vang a ka la hriat hlat theih ber ni mai awm chu , Pi Thanzingi sikul an tih mai thin, Primary School-II a, A-pawl ‘thiamlo pawl’ a chhungten min dah ve kha ani mai a. Room khat ah hian kan thu thup mai a. A, AW, B… thiam tawh chu B-pawlah an dah a, chu pawh room khat tho ah, an thutna lane (row) kha a dang ani mai a,mahse ngaihsan awm tak an ni tawh hrim hrim keini tan kha chuan.

Chutah , thil thar a awm,sikul kalna min sawn sak ta tlat mai. Pu B-a (Billy Lalthlamuana) te in ah min sawn ta dial mai. A-pawl leh B-pawl kan vai in kan han zir ho ve leh ta te kha chu ania . Pi Tanpuii khan ‘arpui sente’ min chhiar sak leh ‘pitar te chhang bawm a thil ri rek rek awm’ tih , nilum ai chunga pawn a min chhiar sak a, kan ngaihthlak thap thinte pawh kha ngaihnawm kan va han ti thei tak em. Chutah nikhat chu min ko khawm ta rup mai a, insak thar chhung ah intlansiak tur an ti a,a in thar chu a chung di a chih ani a, a bang dap ani a, in lian tak e ti lo chuan pindan bang a awm miah lova,hall pangngai tak ang mai ani a, hmel hriat loh pawh an tel tam khawp mai, insak thar chhungah kan intlar pat mai a, hriat ngai hleih loh te nen, “tlan rawh u” an tih rual in kan han tlan a , a bang tawp kan tlan thleng dawn trep tihin tiang nena lo in ring khan “tlan let leh rawh u” tiin Pa Vanlalliana khan tiang nen min lo hawl let, kan tlan let leh a , a lehlam kan tlan thleng leh a, zirtirtu dang khan tiang nen min lo hnawl let leh, chutiang reng reng a kan tlan kual hnu chuan a chhuat lei kha kan lo rap bel ta khawp mai kha alo ni aniang chu, a hnu rei lo te ah, sikul thar Primary School-V kha alo ding ta a.Kal na tur school ani e an tih tak ah chuan kan kal ve leh ta mai a. Pi Malsawmi chauh zirtirtu a nih lai a naupang lian deuh in almira-a a hlauh tur atana ‘rul thi’ an lo dah a, a hlauh theih dan te, a rawn kal hman loh chang a, a pasal in min zirtir chang a, lehkha puan a tih pawp a, “a pawp zawn a, hawrawp hi chhiar rawh u” a tih a kan chhiar thin lai te pawh kha aw!!! Pa Vanlalliana chauh zirtirtu anih lai te pawh kha a awm chang a awm bawk. Tunlai anga “Sir” tih awm ve tawh hek lo le “Pa” Vanlalliana, kha kan ti vek mai a. Pu Hlira ‘morning exercise’ min tih pui thin chu sawi dawn chuan tuktin deuh thaw a thil thleng ania sawi sen chi ani lo. Kut tin fai leh fai loh en ni te pawh a awm thin kha, mahse a endiktu bum dan te chu kan hre ve nual hawm kha chu ania. Kan Head teacher Pa Biaka’n sikul kawt a office buangrua tur a siam lai kan lo khawih ve chak viau thin, khawih a phal si loh lai vel te pawh hun alo rei ve ta ngei mai...........................

Chuktuah Huan

Zingkar leh tlai lam ah te hunawl hnawh khah nan , chuktuah huan ka han siam ve chhin a.Rin aiin a zei loh theih ve ang reng hle mai. Mahse kan hlimpui phian, kan in bul vel a huan siamna tur awl awm ve ho hi a chhak kawng an laihna leivung a ni a..chuvang chuan lei han let chhuak vek a bawngek han dah tur in ka siam tan hun hi ruah tui la tam ve deuh lai , bawngek lei mai tur awm loh hun lai anih avangin , lei let hran lo in thlai kui tiah hnu ah a phun sawn na tur in a khur 5 inches vel a thuk in ka lai vek a, a khur ah chuan vermicompost leh lei chawh pawlh bak ah balu tlem ka telh a..a nun chu a nung tha ve duh ang reng khawp mai. Mahse , ti thang lo tih tak ah brocolli chu ka phun sawn tlai hret a..kawmchhak te chuan september thla a an lo phun sawn tawh kha keini chuan november thla tir ah kan phun sawn chauh mai a..chuvangin kawmchhak te brocolli a par tan tawh laiin keini ve chu a la hla deuh chuan a hriat..chu mai bak ah ruah a sur tawh mang loh hnu a phun sawn chu pangang leh rannung a hnah ei chi an awm tan tawh a, zingkar ah pangang vai du du a ngaih chang a awm thin...
Tomato hi a par tan ve der tawh mai.40 vel ka phun a, a zam na tur atana buara hrui ka siam hi alo la dik tawk lo ani ang , a ching thang ho chuan a zam that theih nan buara hian a kung an lo hling thin alo ni a ..siam that leh ala ngai






Parbawr hi chuan a ngaih vak lo aniang , a thang muang khawp mai...

Brocolli, 100 vel ka phun a, thla hnih a upa an ni ve tep tawh e..


zikhlum pawh hi 40 vel ka phun a, tlem a dam deuh an ngeih anih ka ring, dam lam a phun ho ah chuan an thang chak ber mai!

Hun tawng thenkhat...

Chawlhni chawhnu lam ani tawh. Mizoram lam chu ni se chawhnu inkhawm pawh an bang fel tawh anga, Aizawl ah te pawh han tlan kual ila khawlai a reh ruih hun vel ani tawh. kawt lawk a temple atang chuan vai puithiam hian an durga puja lawmna ni hmiang, mike atangin ring tawk hian a chang in thu chham deuh, a chang a zai ang reng bawk si hi a rawn ti ri reng mai . Motor engine ri leh horn ri chu a ri chuah chuah bawk a. Han len dawn in , enge maw min mamawhna a awm thut ang tih hlauhawm bawk si, room a thut reng ninawm tawh bawk si,dinhmun a han din leh chiah chuan 2003-04 vel a vawi tam tak sawrkar chawlh ka lo hman thin dan min hriat chhuah tir zawk mai.

Inneih atanga kum 7 chhung a hmeichhia an thih reng reng in Criminal Procedure Code in a phut ang in Executive magistrate in Inquiry a ti tur ani a.Hetiang hun tak mai hi a thlen duh hun ani tlat mai thin ani.Kan khawhlui te phei kha chu Telugu tawng hmang tam na ania, dowry-related death case hi a tam ang reng khawp mai a.

Hetiang case ang hi chu a hmun a kal vat a, ruang post-mortem tur a thawn nghal vat anih loh chuan chhungkaw pahnih in kar ah buaina awlsam taka chhuak thei dinhmun anih tawh avang in report a lo thlen rual rual a, police ho nen a thawh chhuah nghal a ngai tawh thin. Hetiang ang case a mitthi then khat te phei chu an chhungkaw pahnih inkar ah hriat pui lem loh a aruk a an lo indawr fe hnu te hian report kan dawng chauh a,zan 1 aia rei te ruang a lo awm tawh thin a,hman hmawh ngai thin tak ani.

A hmun thlen ve leh a ruang an zalh na hmun hma, a thawmhnaw hak, a taksa a thihna chhan sign awm ve deuh, an thenawm te leh amah hre tu hnen atanga a mitthi hun hman dan leh enge buaina an nei thin em? tih zawng zawng te record vek hnu ah , ruang chu post-mortem tur a thawn leh angai. Chutah hmeldang leh chhungte , laina hnai nei ve ta miah lo chu tumah in an rinhlelh theih loh tur ber nih chuan post-mortem lai a awm ve angai...anih loh chuan pawisa an in pe a chuvang chuan...tih hi hriat zawm tur a awm ngei ngei. Nikhat ah miruang pakhat aia tam post-mortem na ah ka awm chang te a awm!!Mihring rilru damna hi a pawimawh si ani.

Hetiang vel chhung zawng zawng hian nau te ho a ruk a thil lo zawt kual a,statement lak tlak deuh pe thei tur lo chhui tir char char angai bawk.Mak ve deuh ka tih thin chu post-mortem tih zawh a mipa chhungte leh hmeichhe chhungte statement lak hian an inneihna a an pawisa senso zat te, rangkachak an in pek zat te, a hnu ah an phut belh leh te ....an sawi thei nghal vek zel!! A mipa chhungte sawi leh hmeichhe chhungte sawi a inmil tlangpui ziah bawk!!

A hnu ah ka inquiry tih reng reng chu keimah ngei court a ka case defend ka duh thin avangin kan khawhlui a ka awm tawh loh hnu ah pawh court ah ka inlan tam phah hle mai.Mahse,ka rilru ah hian vuina vawiin thleng in ala awm lo chu ani.

Vawi khat chu ka rilru ti buai ve deuh tu a awm a. A hmeichhia thi kha CrPC anga chhut chuan inquiry tih tur ani..mahse a hmeichhia thi kha mihring hrisel lo hrim hrim ,damdawiin a thi ani, mahse report a rawn lut ve miau bawk si....a thih atanga chhut in darkar 24 aia rei daih ani tawh a. A ruang awmna ka thlen chuan an khua an inhalna hmun ah thingfak chheh khawm chung ah hian hal mai tur in an lo dah tawh a....engtia tih tur nge ni ang??? ...a mipa lam leh hmeichhe lam in complaint an siam lo ve ve a, kal san leh mai tur nge ni ang?? ti a ka ngaihtuah lai tak in, Pawisa an in pe a chuvang chuan complaint a awm lo tih kha thil awm thei ani ve leh tlat mai a. A ruang an zalh tawh lak thlak tir a post-mortem tur a thawn chu thil nuam tak ani hran lo khawp mai.

A sei lutuk hma in..vawi khat inquiry ka tihna chu a hmeichhia kha inawkhlum ang in a sari in ceiling atang in an lo khai a.Mahse lukham in mi pahnih in thawhtheilo in an nem hlum tih kan hmu chhuak a. A dang leh pakhat erawh a pasal kha a MIPA thei lo a, a hmeichhia khan TUR a lo ei a a thi tih kan hria.

.......... (hman hun a sawi zawm leh ah)

Case 1:(courtesy chepahakhata & Varte) :D
Lukham a an lo nem hlum: Hei hi a ruang kha inawkhlum ang in puan in ceiling ah an lo khai a. Raipuar lai ani leh nghal a, sawisakna hnu hma a awm leh awm loh ka en chhuah vek hnu ah a ruang ka lak thlak tir a.Tin, a buaithlakna pakhat awm ve leh chu a mipa leh hmeichhe chhungte ve ve kha politician , party hran an lo ni ve leh zel baw a.

A hmun ka thlen a ka hriat theih mai chu, a inawkhlum a awm nikhan a unaupa nupui neih ni ani a, chuan a pasal nen khaw dang ah a unaupa nupui neih lawmna ah chuan an zin dun a. Chawhnu lam dar 4 vel ah an in ah a pasal nen vek chuan an haw dun hmu tu an awm a, chungte pawh chuan a pasal chuan kal kawng an kal lai vel in a chhuih haw phei vel tawh niin anmahni hmu tu te chuan an sawi ani.

An thenawm te ka kova, insual thawm leh thawm dang a awm leh awm loh ka zawh chuan thawm a awm loh thu min hrilh a. A ruang inkhai te pawh tukverh atanga hmu mai an nih thu te leh, ka thlen ve pawh in kawngkhar kar chhia in inchhung chu kan lut thei chauh va.

A Pasal kha anu nen chauh a khawsa an ni a, a pasal a nu kha khaw dang a zin daih ang a inlantir a tum bawk a, mahse a thih hun lai tak awm vel darkar kan han chhut khan an in ah an pathum in an awm hmel tlat bawk si ani.

Hetia inquiry tih lai hian mipui a pungkhawm hnem ang reng khawp mai a, chung ho lo control tur chuan police pawh ka dah hnem ang reng khawp mai a. Thil awm dan leh inchhung vel zawng zawng pawh khawih chet hma in thla ka lak tir thlap vek bawk ani.

Chuan a ruang chu post-mortem turin damdawiin lam ah ka kalpui ta a, chungte pawh chuan a mitthi chhungte leh khawtlang hruaitu lam te pawh in min la zui dul dul mai a.

Post-mortem an han zo va, ka rinhlelh rilruk deuh ang ngei in a ti tu doctor khan inawkhlum anih a rin loh thu min hrilh ve leh ta mai bawk a. Chuan a thisen leh thil dang laboratory a test tur samples an lak ho te chu vellore lam ah kan thawn ta ani.

Statement lak chu an panchayat members 7 vel awm laiin a indawt in kan zawt ta nghauh nghauh mai a. Ka staff te ho in an lo ziak thla zel a, thu zawh belh duh kan neih apiang chu kan zawh belh nghal ta zel a....

Statement pek duh loh vang in mitthi pasal a nu chu court building ah a tawm tlat mai tih an rawn sawi leh. Kan han nghak deuh vang vang a, police ho in court room chhung a luh an hreh nasa mai si a, ani kha court a hnathawk alo ni bawk si nen. Lehlam ah Minister leh politician lam atang in phone ka dawng a fimkhur leh dik thei ang ber a kal pui tur a min duh thu leh kalpui chak deuh tur a min duh thu ka dawng ve sek bawk si.

Chuan a rei tak deuh hnu chuan magistrate an rawn a, ani remtihna in police ho chuan mitthi pasal a nu chu court building ah chuan an luhchhuak a. statement chu kan lak sak ta a.

A sei dawn em mai.....kan inquiry a kan hmuhchhuah tak chu, a mipa lam khan demand an lo nei a, hmeichhe lam kha a unaupa nupui neih tur a sum sen angaih avang in an lo pe thei mai bik si lo kha alo ni a. A mitthi pasal kha autoriskshaw driver ania, an thil demand pawh autorikshaw Cheng nuaih khat man awm vel kha alo nia. Kha mi an pek loh avang khan an unaupa nupui neihna an kal an in a an haw leh hnu lawk ah an nufa khan an monu chu lukham in an lo nem hlum hi alo ni a.
A nu leh a fapa chu police in an man nghal a, a hnu ah bail in an chhuak leh a, mahse a pasal zawk hi chu a hnu deuh lawk ah a inawkhlum zui ve leh ta thova. Court he case avanga ka din tum pawh in a nu lam te lawyer chuan khei pawr na tur an dap kual nasa ve ang reng fu a, court chhung ah te khan an tap tliar tliar a, mahse dowry death case a ka hmuhna ah ka tang ve tlat a, court in a pawm ta nghe nghe!

Hello

Tlai lam dar 6 a ri tep tawh, office atang in haw tum in ka inbuatsaih vel mek, Phone ah min be duh an awm a, recruitment exam kan buaipui lai mek pakhat zing a mi, candidate pakhat ania..tiin min rawn hrilh a.Tirunelvelli lam atang in a nia, hall ticket ala dawn loh thu leh, civil judge recruitment chu kan kal tlangpui dawn nge dawn lo tih a rawn hre duh hi alo ni a, kan website atang in en mai tur in ka hrilh a, a download theih chuan print mai theih tur a kan dah vek thu ka hrilh bak ah, G.O(Government order) thar engmah ka la dawn loh thu leh G.O. awm lai anga kal pui zel a nih thu ka hrilh bawk a. Chuan.......

Zan ah tui tak in ka mu, a tuk inrinni ania ka tho hma lua lem lo.chaw ei kham a newspaper kan chhiar chu "The Hindu" ah kan inbiakna vel kha an lo chhuah kulh mai a.Civil judge recruitment hi India danpui (constitution) ah chuan state Public service commission(TNPSC) leh High court in an tih dun tur ani a. Mahse, an tih tur chiah ve ve a in ziah loh avangin ; state sawrkar, state public service commission, high court ,ten kal pui dan tur an duan anga tih mai tur ni awm tak ani a,mahse an inrem thei lova, rei tak chhung recruitment tih theih loh a lo ni tawh ani(kum 5 vel ani).State public service commission chu sawrkar ai awh a recruitment ti tu tur ani a, mahse a rules leh procedures vel chu State sawrkar in G.O a tih chhuah anga tih mai tur ani a. Mahse, an pathum a inremna a awm hleih theih tlat loh avangin High court ,full bench in, high court registrar kha petitioner ah tan tir in, anmahni in recruitment conduct dan tur order an chhuah a, state sawrkar pawh G.O ,an order zui a amend mai tur in a ti ta a, a hun a bi tuk bawk ani. Contempt of court awrh theihna dinhmun anih tak avang in , public service commission meeting ah ka thlen nghal vat a, supreme court a appeal kan rel thlu a. Supreme court ah ka appeal ta a. Kei petitioner ka ni a, Registrar high court kha respondent ani ta thung a, Chief Justice of India ni thin KG Balakrishnan leh judge dang 2, court hma ah thu inchuh chu a kal ta ani.
Hetiang teh nuaih anih avang hian media lam in an ngaihven em em a.Interview min dil chhen hlawm a, tumah ka be duh lova, office campus chhung an luh pawh ka phal loh avangin candidate anga rawn insawi in min lo phone hi alo ni a.
Supreme court pawh in order a chhuah hlei thei bik lo aniang, thla enge maw zah an ngaihtuah hnu ah pawh " an 3 kar a inremna awm theihna dal tu ani lovang he case ngaihtuah mek hi" tih vel bak in thu an chhuah hlei thei lo.Hei vang hian TNPSC leh High court in kar ah palai hna ka thawk zawm ta chu ani deuh ber e. Engtiang a tih zui tur nge tih chu High court Registrar pawh in engmah thu a sawi ngam tawh bawk si lo, Chief justice leh senior judge dang pathum nen nitin deuh thaw , a issue awm kan sawi ho ziah angai a, chu kan sawi ho chu TNPSC ah thlen a member leh chairman te nen sawi ho leh a pawm ho theih lai leh pawm ho theih loh lai te sawi ho leh a..kual kual angai ta!!

Sawi ho fe hnu ah chuan thil dang zawng zawng ah inremna a awm vek tawh, mahse interview board a thu tur leh mark pek dan tur ah chiah inrem a theih loh, chutih hun lai a chief justice chu (delhi high court a chief justice a retired ta kha ania),thil dang zawng ah chuan TNPSC nen inrem lohna a awm lo, mahse interview board a thu tur high court judge ah khan ani chuan judge pakhat chiah , a nominate tlat mai a,
; interview board engzah pawh awm se la a pawi lova, mahse judge pakhat chiah hi a board ah chuan a thu zel ang a ti mauh mai.TNPSC lam in an duh bik si lo, chuan ani an transferred a, tun a Supreme court judge ni chho ta pakhat hi chief justice ah a rawn awm ta a.Inremna a awm thei ta. Supreme court kan hriat tir a, a case chu closed ani a, kan inremna ang chuan sawrkar pawh in G.O(civil judge recruit dan tur) thar a chhuah ta bawk.

chutah le.... civil judge hna ruak dil theih tih advertisement kan han chhuah hnu deuh lawk ah, court a thawk ,law degree nei ho pawh in an dil ve thei ang tiin high court in order a rawn chhuah leh ta mauh mai, an lobby chu ani ngei anga court a thawk ho khan( a G.O ang chuan advocate, state bar council a kum 3 tal in register tawh, practicing lawyer, minimum mark Law degree a an hmuh zat tur ...etc tih vel ani ).
He high court thutlukna duh loh avang hian a state pum pui ah advocates ho in court an boycott char char a, thla hnih dawn thaw inremna an nei thei lova,....an advocate hruaitu ten a khat tawk in min rawn hmu deuh reng a, state sawrkar ah pawh pressure an pe nasa em em a...state sawrkar in recruitment tih dan tur G.O chu a amend ta bik hrih chuang si lo.Heng avang hian application kha process lo ta ngawt ila, examination date ruat lawk vek ani tawh a, thil tih chi ani si lo. G.O. nge high court order zawm tur tih avangin application endik tu te khan an duh zawk zawk kha zawm ta ngawt se la ani thei chuang si lo. G.O ang in kal pui phawt ila, a bak chu thil in her chhuah ang zel in ..tih chu ka thu tlukna ani . Court a thawk , law degree nei ho application zawng zawng chu ka reject tir vek tawp mai a, a hran in record fel tak siam in ka dah tir ta ngawt!
Hetiang teh nuaih anih avang hian High court nen a meeting kan neih reng reng ah ; chief justice leh judge senior ho hnen ah pawh, a sensitive tawh zia te, keimah ngat phei chu north-east mi ka nih avang leh mihring 'clean image " nei, tumah in caste/politics ..etc vel a an "question" theih loh tur ka nih avanga min dah anih thu te,he thil buai hi a kal zel chuan recruitment dang te pawh mi in an question vek anga( sawrkar hmasa lam in kum 5 chhung teh meuh sawrkar hna thar lak alo khap tawh a, sawrkar thar in hnaruak zawng zawng hnawhkhah leh a ti bawk sia, kar tin deuh thaw recruitment exam kan conduct thin ani)., "blown out of proportion" an tih thin ang dinhmun anih tawh thu te, a post a ka va thlak pa pawh keimah aia kum 10 chuang daih a senior anih thu te leh , hetiang thil avanga transfer ka ngaih phah anih dawn chuan thlak na tur state sawrkar tan pawh a buaithlak dan tur te pawh ka sawi ve.
Hetiang vel anih nuaih lai hian candidate pakhat anga rawn insawi in "The Hindu" ho chuan min rawn phone a, a tuk ah news item ah an rawn chhuah zui ta a. He news item chung chang ngaihtuah tur hian high court in full court meeting ( High court judge 40 vel an ni ta in ka hria) a hranpa ngat in a kova, registrar tak ngial pawh tel ve phal tawh lo in, chief justice leh High court judge 40 rual chuan an rel zui ta a. An thu tlukna nghah chhung erawh a rei duh in , hun a kal muang duh churh churh ngei mai!!

Mizoram lam ah.

Nimin lawk emaw tih pawh in hei mizoram sawrkar a ka thawh ve hnu ah pawh kum chanve vel chu alo ral leh ta der mai!!Tamil nadu te anga SMS/e-mail/fax hmang a report thawn te leh tih tur in tuk te awm ve ta lo chu phet sek leh buai reng reng a awm chu a awm ta mang lo.

Enge kan han tih zawm tak ang le aw?? mizoram medical council bill, kum 5 vel pending tawh chu assembly session hnuhnung ber in a draft kan put luh min pawm pui hram a; Medical college din na tur in concept paper thla hnih chhung vel in a tui mi te tanpui leh pui bawm na zar ah kan peih leh hman hram a, hmabak erawh ala thui raih raih hle mai!!
Sawrkar hnathawk te leh kan hruaitute te a deu sawh leh nasa deuh deuh a sawi chhiat hreh lohna ram ah hian, engtin nge hetiang her rem tur hian hma kan lak chhunzawm tak ang le?? Property returns sawrkar hnathawk ten an tih makmawh mahse mizoram lam a an ngaih pawimawh ngai lem loh te pawh mumal zawk deuh a kal pui chhoh na tur a hmalak mek ani..mipui leh sawrkar hnathawk te leh hotute lam atang pawh hian in ennawn tlan vek chu kan ngaih hmel a, engtin nge zawhte chu th(r)i kan awrh tir tak ang??

Chakai khawrh kawr

Hnathawh ni chuan nitin a hmel hmu tur ka ni, mahse ka hmu ngai lo. Ka awm na thin a awm ve thin ngei tur chu ani bawk si.Damloh na leh theih lohna vang te anih ngawt loh chuan nitin inhmu thin tur kan ni, mahse a hmel a rawn lang ngai si lo....

Rin loh tak mai in kan ti dawn nge, beisei ngam tawh loh hnu ah nikhat chu a hmel a rawn lang ve hlawl mai a. Kan thawh ho na tur hmun leh a thawmhnaw hak chu a inmil hlawl lo. Hnathawk tur a in atanga rawn chhuak chu ani chek anga, mahse a hnathawh tur leh a incheina kha a inhmeh mawlh lo ani. A sam a rawn zuah sei nghuau mai a, a tuak ala awm phauh phauh zui a. A sam han en reng reng khan sahriak leh samkhuih vel chu a tawng khat ani tih hi a hriat hliah hliah mai a. A hmui hmul leh khabe hmul vel te chu uluk vak lova meh thuak thuak ani tih hriat tak mai hian a la lawr deuh phiar phuar a.A han tawng zawng te chuan a ha kar a kuhva ei na dum te chu a lang thei a, a han thawk zawng te chuan zan lam pang nge zing lam pang chu a hriat theih loh a , a thil in rim chu a rawn nam deuh huk huk bawk a.
Chakai khawrh kawr an tih ang hi a ha a, kekawr bul a ha bawk a. A inthuam dan leh a hmel han en chuan huan a kal tur anih loh vek leh sangha man tur a lui a kal tur ni mai awm hi ani roh a. Mahse kan awm na a hnathawk tur chuan a rawn kal ve miau bawk si ani.
Rei lo te kan in biak zawk hnu ah ama room lam ah hna thawh tur nghak in a kal sawn ta hrih a. Chhun thingpui in alo hun a, mi dang in thingpui leh a hmeh an han hlui chuan ani chuan ..
"Rakzu lo chu ka in ngai lo" tiin a lo hnar ta mauh mai le.A pe tu lah a hrilhhai a, engtia han biak zui zel tur nge tih lah hriat a har!!
Kan han awm ho ta zel a,Kar khat kan han awm ho hnu chuan amah ah danglamna nasa tak hmuh theih in a rawm awm a. Nu ho leh hmeichhe lam pang in an fuihna avang ani teh reng ang chu, a sam te chu rawn met fai in, a khabe leh hmui hmul te pawh chu a fai thin ta viau mai a, thawmhnaw pangai kamis leh kekawr tlawn nawh mar tha tak hian a rawn kal ta ziah mai a.... zan lam a thil in rim pawh a nam hriat tur a awm ngai ta reng reng lo mai bawk a. Kan inhmuh hmasak ber a arawn hak, chakai khawrh kawr leh kekawr bul chu engtik hun ah nge a hak thin tih ka zawh chuan, hnathawh nan leh lui a kal chang in a hak thin thu leh, vanapa hall hnuai a mi a lei anih thu te, THIL a in thin chu a duh phawt chuan treasury square leh zodin in kar ah engtik lai pawh a lei tur a hmuh thu te min hrilh tel bawk!!
Hringnun hi kan khawsak pui te a zir hian kan awm dan hi ava lo danglam nasa thei awm em ve le aw..tih hi a hmel hmuh a piang hian rilru ah a lo lang zawk thin mai nia.

Khualbuk Vengtu

"Khualbuk vengtu ang mai ka ni,
Sualin min bawm reng e;" (Hmanah Kaisar lal lian rengpui - Rokunga 1914-1969)

Nikum krismas ni tak mai khan kan biakin ah he hla hi kan sa a, lam pawh enge maw zah an awm a, chutia ring tak a sa ve chung a mi lam ka thlir lai chuan ka rilru ah "engvanga khualbuk vengtu ang mai ka ni, sual in min bawm reng e" ti a he hla phuahtu hian a phuah tak mai le aw?? tih a rawn lang a.

He hlathu anga ngaihtuah hi chuan khualbuk vengtu kha sual in a bawm ni awm tak ani a, khualbuk vengtu sual in a bawm anga ngaihtuahna lo chhuahna pawh josefa leh mari te kha khualbuk a an len ve tak loh avang kha ni awm tak ani a. Khualbuk a an len ve tak lohna chhan kha eng vang nge ni ang le aw?? Khualbuk ah khan hmun ruak la awm reng si in an thlen ve an phal lo nge ni a? hmun ruak a awm tawh lo hrim hrim?? tih hi rilru ah alo lang tel nghal a.

Khualbuk ah hmun ruak awm reng si a, a thlen man an pe ve thei reng chung si a, midang an aia thleng tlai te tan hmun zuah an duh avanga josefa te kha leng ve lo an nih chuan khualbuk vengtu pawh chu a dem awm thei viau mai thei. Chuti ni lem lova, mikhual an lo tam tak em avanga thlen man alo san tak avanga josefa te khan thlen man an pek theih loh avanga leng lo an nih chuan khualbuk vengtu lo dem na tur chi em ni dawn le aw?? tih ngaihtuahna ah a awm a.

Khualbuk ah hmun ruak a awm tawh loh tawp avanga josefa te kha khualbuk a leng lo an ni ve leh thei tho bawk awm e. Chuti anih phei chuan khualbuk vengtu han dem na chhan tur avang leh zual ni te hian ka ngaihtuah ve mai mai a. Khualbuk vengtu dem awm na lam aiin josefa te thlen tlai na lam kha khualbuk a an len loh chhan ah chuan a dem awm zawk lovang maw aw..tih te rilru ah a awm a. Tunlai a kan sawi teh fo "pen tui hring" a recommend an nih avanga josefa te kha thleng tlai chung chung a khualbuk ah khan an aia thleng hmasa te luah lan tir in hmun pek ni ta se la , a fel hlel zawk lovang maw? tih te pawh ngaihtuah theih tak ani in ka hria.

Hetiang thu vel mai mai ka ngaihtuah vang nge maw ni a hla chang dang
" Khualbuk vengtu suihlung mawlin,
Van Lal Rengpui ka lung damna,
Puan ang a hnawl ta e" ....
tih awm na chang kan han sak lai te pawh chuan han lam na chhan tur ka la hre ve ta chuang reng reng lo mai a!!

Zing kar

Tunlai chu thlasik boruak te alo thaw ve leh ta bawk a, zingkar boruak anuam thei ang reng hle mai. Zing dar 5 pelh hret ah pawh khum atanga han harh chiah hian tukverh ah han hawi chhuak ila khua alo eng tawh a, zing ni chhuak hnung puak chung a thingpui no han dawm khuk deuh vat vat pawh nuam tak ani.

In atang in han chhuak ila, kawngpui kan han thleng chiah a , dai in vaivut a chiah hnawn la hul chiah lo ah te hian zan lam a kawng kal ho rahna ni awm tak hi ke hniak te hi alo la lang chiang hle mai a,Agape camping centre lam ah han kal zel hian kawng chhak lam a thing leh hmunphiah hnah vel a dai tla te chu ala far deuh kauh kauh hi hmuh tur a awm a. Arsa rimnam kung ah te chuan tlaiberh sava hi an lo rak nawk nawk hmuh tur te pawh ala awm a, sava pakhat chawngzawng tiat vel tur, a taksa chunglam dum, a hnuai lam var te hi kawngpui ah te hian an lo sawt zau zau hi hmuh tur a awm zauh zauh bawk a. Agape training centre bul vel ah a thlang lawk tlang pawng a phul hmun deuh ah te chuan hman ni zing ka kal pawh vahlah rual hi chil chhuah tur an lo la awm a, a mak ka ti ang reng hle mai. Kan naupan lai ti ve ta mai ila te kha chuan vahlah rual hram thawm hi zuangtui ram vel a kal te chuan a tam thei em em a, tunah erawh hmuh tur a van tawh teh reng nen kawm thlang lawk ah an awm leh tan tawh, a bul vel a in nei tu te phei chuan tlai lam ah te phei chuan um phak tawk lek lek ten an tlan vel thin tih an sawi han hriat te phei chuan a ngaihnawm ang reng hle mai. Mahse, agape camping centre thlang lawk saisih ram an tih mai a kan naupan lai a tam ve thin ang reng tak vaki erawh chu vawi khat mah ka la hmu leh lo thung a.... tlem a kum lam a upa deuh tawh te ka han zawh a tunhma chuan saisih tui hi sai in an tlan thin a, huai te pawh nei a sawi ani tihte min hrilh ve leh ta zel a...tun a achhak lawk a mihring chenna in lo ding thluah ta mai te nen a khai khin chuan ramsa ho khawsak na mihring in kan luah chhoh mek zel dan te pawh a ngaihtuah theih e....!!
han sawi tak zel ah chuan ka hriat ngai hleih loh hian mi hi tho hma fe fe an va lo tam tak em tih hi ani. Aizawl theological college lam kawng ani emaw, bawngkawn Leitan chhuk kawng ani emaw zing kar ah te han kal ve te hian exercise la mi tha hnem tawk tak hi tawh tur an awm ve ziah nia maw le!!

Bawng-pu

He bawngpu hian ka zawhna dik tak a min chhang anih chuan, thlatin Rs 4000/- a hlawh a, nitin bawngchaw vawi hnih phur in a chhuak thin a, tin, amah hi Hailakandi lam atanga a thian ten mizoram a an rawn hruai ani a..mizoram ah kum ruk vel awm tawh in, mizotawng in a biak thui theih tawh khawp mai. Nupui neiin fa pahnih an nei tawh!!

Ni khat chu

Hrangbana College, Aizawl atang in BA kan han zo ve a. Chutah NEHU (shillong )ah MA kan han zo ve leh hram a, chutah Aizawl lam ah kan han haw chho a, UPSC(civil service) examination ziah te kan han rilruk ve a, Coaching class kal bawk si lo chu, mahni a in hai ven chawp angai,a va han bo theih in, a va han buai theih tak em!

First optional chu MA a ka subject lak pangai tho a lak nghal theih mai a, second optional tur in rilru a ti buai ta hle mai. Aizawl ah lehkhabu tha lei tur awm bawk si lo!! Syllabus leh lehkhabu rawn lar zual te, journal lar zual te delhi a zin tur chah mai bak ah , lehkhabu dawr lar zual te an address zawng in book-post ten chah tlauh tlauh angai. Chu mai ala ni lo.... national newspaper pakhat "The Hindu" ka subscribe ve lah chu zoram news agency, treasury square ah kar khat ah vawi khat te a thleng , kar khat issue te hi a hlawm a lak ani thin; a chang leh ruah te hian alo nan zawp a, ro leh khir deuh uaih a kar khat issue a hlawm in ni khat a hawn chang lah a tam! study material dap khawm hnu a chhiar ve leh duh bawk si chuan hun a kal chak duh khawp mai...chutia mahni tawk a mawng vawm ba an tih ang mai a , in duhthawh em em a ka buai ve em em lai chuan......

Ni khat chu ,chhungte an chhuak fai tawh , ka in buatsaih dawn tan chiah phone a rawn ri...

"hello"

"....a awm em?"

" awm lo"

"bye"

Rei vak lo ka chhiar a, ka han in buatsaih leh dawn tan chiah a kawngkhar an rawn kik a, ka hawng a ,kawngkhar kan hawng a, em phur hmeichhe pakhat a rawn lang a...

"lo lut rawh enge in duh?"

"chawhmeh in lei duh em?"

"a lei tur an awm lo tlat mai, keimah chauh in ah ka awm a"

kan inthlah liam leh ta hram.

Chu ti chuan rei vak lo chhung chu newspaper a issue in ang deuh ho a ka hriat sakawrbakcheh in ka chep thla a ,a hnu a chhiar leh awlsam nan leh source dang atanga chhiar zau hman a chhiar belh ah ka clip khawm a, ka tih zawh hma in kawngkhar kik ri a rawn awm leh a, ka han hawng a...vaipa buara pu hi a lo ding a

"ka pu thirchhia....bottle ruak hralh tur in nei em?" a rawn ti mai chu, hman hmawh na nen, ka tawng chhuah hma in ka melh vang vang a......

"Nei lo tlat" tih sawi rual rual a kawngkhar khar nghal ani tawh mai.

Chuan ka han in buatsaih ve leh a,ka rilru ah a rawn lut dawn tan chiah tih hian kawngkhar kik ri a awm leh ta tlat mai....thawh a harsa talh tawh mai.Thut hmun atang in.....

"I sawi duh chu kha ta tang khan sawi mai rawh....."

tih chu ka thut hmun atanga ka chhanna ani ta mauh mai...chuan a reh leh vang vang a..a rawn kik nawn leh a, ka va hawn chuan kan unaupa, Aizawl a rawn zin, kan in a riah rawn tum chu lo ni in...

"ava hrilhhai thlak ve maw le" an ti zet chu ka in ngaihtuah chhuak a ,kan han nui dun leh kar kar phawt a....Tlai chaw ei hma chhung inkhawm dawn tawh, thut kim thap tawh hnu in a sawi chhuak leh a,kan han nui tlang leh dar dar a....ka ngaihtuah leh a, vawiin thleng hian a hrilhhai thlak tur zia vel te..mahni in rilru ah ka la nui ka la nui thin.. :)

Ratu ah-II

Mahni ah pawh library luh chilh a lehkha chhiar nasat lai ani bawk a, tum reng vang pawh ni lem lo hian pulpit atanga mi sermon te hi rilru hian alo hnial zut zut thin lai ani na chung in Ratu KTP conference a Speaker thusawi hi chu ka rilrem zawng tak ani tlat mai, rilru in alo hnial zut zut lo tlat. A taka kan hmuh nghal theih tur ang chi hlir mai a sawi ta mai a!! Thenawm te rimchhia tih tur a vawkin sak hi a kristian lova, Chaltlang Remi tyre work bul a bawlhhlawh paih vum thur mai te hian kan hmel ati bal tih vel an sawi te chu, a hnu a YMA in kan tihfai tum a a uih dan te kan ngaihtuah let chuan sawi chhuah awm tak niin ka hre leh hnuhnawh.

Tin, General conference chhim tur a kal lam ah khaw tam tak ah kawng kham zawng a hrui lo pawt a theitui zuar a inhlawh a , in duh zah zah min pe rawh u ti ho pawh a sawisel zauh a, kan haw lam ah chuan tumah hrui pawt an awm tawh lo!!

Sermon ngaihthlak mai bak ah, hla thar ka hriat belh teuh mai a,a hlawk thlak khawp mai!! Khawhar lenpui na ah pawh hmun dang a awm e ti lo in mi zai rual in inkiltawihna awm miah lo in zai ve theih ta.A nawm mai bak ah heng te ngaihtuah chuan a ngai ang bawk khan kal leh dawn la i duh angem? tih zawhna tawng ta ila, duh e tiin ban ka phar rang ngawt in ka ring!

Ratu ah-I

Kum sawm vel a liam ta, Shillong khaw vawt vur mai hmun ah lehkhazir lai ania, chawlh laiin Aizawl ah ka awm lai ania. KTP,General-conference(inkhawmpui) nen a in nang ching hlauh mai a, tel tur in hming ka pe ve . Ratu khaw hming chu ka hre thin a, college kan kal lai a kan thiannu Lalteii te khua ani tih pawh ka hria. Mahse, ka la hmu ang tih erawh ngaihtuahna ka nei ngai lem lo. KTP inkhawmpui nghahna anih avangin Ratu khua lam pan in bus in kan han kal ta ani. Thalai awm khawm tih tak ah bus a tlan pah in an zai ho thap thap mai a, an hla sak ho chu hla lar thar ani chek ani ang chu, sak thiam ka nei ve mang hauh lo mai a!

Tichuan kan tlan zel a, Ratu thlen hma in khaw tam tak ah kawng kham zawng in hrui an lo thlung a, theitui an lo zuar a, kan han in sak tak lawp lawp a. Ratu khua chu tlai lam ah kan thleng a, thlen in tur an han sem dan dan a,kan thlen in ah mikhual ho kan han awm kim chiah chu, in pakhat ah mikhual thleng kan tam hle mai.Kan thlen in ah chuan mi 30 vel kan thleng ta in ka hria. In dang a mikhual thenkhat te phei chu an thlen in ah mutna an leng lova, UPC biakin ah zan a riak te pawh an awm a; hemi inkhawmpui an han thlen meuh chuan an khua an tanrual zia a ti lang ve viau in a hriat. Chhungkaw thenkhat lah in an in a riahna leng lo an mikhual ho riahna tur in an in bul ah di in te an lo sa thar ve bawk.

KTP inkhawmpui ah ka vawi khat tel na ani bawk a, zan khatna inkhawm tur a pandal a thutna han zawn chu a khawr theih hle mai. Chutah kan han zai tan a, a “bass” sak dan tur te, hla bu a solfa en dan tur te,“doh-hniam…doh-sang…etc” ka kalpui pa in min han zirtir chawp tak lawp lawp a. Biakin a inkhawm a hla sak thum ve satliah ringawt ang alo ni hauh lo mai !!Mahse han zai hnem chuan kan lo hre ve ta tial tial a. Thalai rual a hu hova han zai thup thup mai kha chu a va han nuam tak em!!

In khat ah mikhual thleng kan thahnem bawk a, chawbel leh chawhmeh bel a lian tawk bawk aniang, chaw leh chawhmeh a hang thei khawp mai. Dailuah hang tak mai leh thlenin te kawmthlang ami zawngtah bal(lawh) thar ngei mai leh hmarchate rawt han ei meuh zawng, chaw eikham chuan kan rih belh lawih hian a hriat thin!!

Chaw ei sawi tak ah chuan mikhual nei ngah lehzual an VCP te mawlh kha aw!!! an in pekna a fakawm thlawt ani.Mikhual 100 aia tam an thleng a, chaw ei hun te khan in koh khawm a buaithlak deuh ngei in a rinawm a, an in kawt ah dar an vaw ri tawp zel !!!

Kan thlenna in chu a chung rangva, a bang dap leh a chhuat thingphel ani a. A kawngkhar ah mizopa kawngkhar, mau hmang a siam(tah) ang hi an hmang a. Hawn dawn chuan a sir zawng a nawr tawlh mai tur kha, thlenpui thenkhat hawng thiam lo an awm tlat mai. Tlai khat chu chaw ei hun nghak a kan zai thap thap laiin kan thlenpui nu pakhat hian kawngkhar chu a rawn keu a, a hmai a rawn lang zawk a, a khar leh thin a, a tih nawn fe hnu ah a tawp ah kawngkhar chu hnuai lam atanga hlim chho in a rawn kun lut a , “enga tinge?” ti a kan han zawh chuan , a hawng thiamlo hi alo ni a. Mizopa kawngkhar ang hi alo la hmu ngai lo hi alo ni a!! MA zir zo tawh pawh ,khawpui a piang a sei lian tan chuan hmuh ngai miau loh chuan hriat ngaihna awm lo ni awm tak ani. Kan nuihpui nasa khawp mai.